काठमाडौँ । प्रमुख प्रतिपक्षी दल नेकपा (एमाले) ले प्रतिनिधिसभाको बैठक बहिष्कार गरेको छ । आजको बैठकको कार्यसूचीमा अर्थमन्त्री जनार्दन शर्माले विनियोजन विधेयकमाथि उठेका प्रश्नहरुको जवाफ दिने पालो थियो ।
बजेट अनधिकृत व्यक्तिको हस्तक्षेपबाट बनेको तर सो सम्बन्धमा छानबिन नभएको भन्दै एमालेका सांसदहरुले संसद् बहिष्कार गरेका हुन् । एमाले सांसदहरुले यस्तो अवस्थामा अर्थमन्त्रीको जवाफ अनावश्यक भएको पनि बताए ।
बैठकमा अर्थमन्त्रीले जवाफ दिने क्रममा एमाले सांसदहरुले विरोध गरेका थिए । यद्यपि अर्थमन्त्री शर्माले एमाले सांसदहरुलाई बेवास्ता गर्दै जवाफ दिएका थिए । एमालेका प्रमुख सचेतक विशाल भट्टराईले अर्थमन्त्रीको जवाफ सकिनासाथ प्रमुख प्रतिपक्षीको विरोधलाई बेवास्ता गरेको भन्दै संसद् बहिष्कार गरिएको घोषणा गरे ।
उनका अनुसार प्रमुख प्रतिपक्षी दल विरोधका लागि उभिइसकेपछि सभामुखले सदनलाई अगाडि बढाउन दिन हुँदैनथियो । उनले भने, “यस्तो अवस्थामा अर्थमन्त्रीको जवाफ सुन्नुपर्ने कुनै कारण छैन, हामी यो सदन बहिष्कार गर्छौं ।”
भट्टराईले सदन बहिष्कारको घोषणा गरेलगत्तै एमाले सांसदहरु बैठकबाट बाहिरिएका थिए । यद्यपि सभामुखले बैठकलाई जारी राखेका छन् ।
