काठमाडौँ । नेकपा (एमाले) का अध्यक्ष केपी शर्मा ओलीले स्थानीय तह निर्वाचनमा विरोधीहरुका कारण भन्दा पनि पार्टीभित्रका शकुनीहरुका कारण केही सिट संख्या कम आएको दाबी गर्नुभएको छ ।
स्थानीय तहमा पार्टीका तर्फबाट निर्वाचित भएका पालिका प्रमुख/अध्यक्ष तथा उपपमुख/उपाध्यक्षहरुका लागि प्रशिक्षण तथा अभिमुखीकरण कार्यक्रमलाई सम्बोधन गर्दै अध्यक्ष ओलीले पार्टीका विरोधीले नभई पार्टीभित्रका शकुनीहरुले हराएको बताउनुभयो ।
उहाँले भन्नुभयो, “पार्टीमा मिर्जाफरहरु पनि निस्किए जसका कारण केही सिट गुम्यो ।” उहाँले आफ्नै कमजोरीका कारण ८८ सिट गुमेको दाबी गर्दै पपुलरमतका आधारमा एमालेको जनमत नखस्केका दाबी गर्नुभयो ।
उहाँले भन्नुभयो, “६४ वर्षदेखिको चुनाव हेरिरहेको छु । यस्तो पैसा, प्रशासन र प्रहरीको व्यापक दुरुपयोग कहिल्यै भएको थिएन । यस्तो अवस्थामा पनि दृढतापूर्वक विजयी भएर आउनुभएको छ ।”
पार्टीको स्कूल विभागले आयोजना गरेको प्रशिक्षण कार्यक्रममा ओलीले एमालेको मुल्याङ्कन जनप्रतिनिधिहरुको कामबाट हुने हुँदा जनताको मतमाथिको विश्वास टुट्न नदिन निर्देशन दिनुभयो । स्थानीय तहमा निर्वाचित भएका पालिका प्रमुख÷अध्यक्ष तथा उपपमुख÷उपाध्यक्षहरुका लागि प्रशिक्षण तथा अभिमुखीकरण कार्यक्रम दुई दिनसम्म चल्नेछ ।
