काठमाडौँ । एक महिला र उनकी छोरीमाथि हातपात गर्ने लुम्बिनी प्रदेशकी स्वास्थ्य राज्यमन्त्री विमला वलीलाई कारबाहीको माग गर्दै प्रदर्शन गरिएको छ ।
मंगलबार तुलसीपुर उपमहानगरपालिका–५ बसपार्कस्थित एकराज बस्नेतको घरमा पुगेर राज्यमन्त्री वलीले उनकी श्रीमती र छोरीलाई हातपात गरेको भन्दै स्थानीय महिलाहरुले प्रदर्शन गरेका हुन् ।
यो पनि पढ्नुहोस– लुम्बिनी प्रदेशका स्वास्थ्य राज्यमन्त्री विमला वली प्रहरी नियन्त्रणमा
वलीलाई नियन्त्रणमा लिएर राखिएको इलाका प्रहरी कार्यालय तुलसीपुर परिसरमा वलीमाथि कारवाहीको माग राख्दै स्थानीय महिलाहरुले प्रदर्शन गरेका छन् । उनीहरुले वलीमाथि कानूनी माग गर्दै नाराबाजीसमेत गरेका छन् ।
स्थानीय महिलाहरुले नाराबाजी गरेपछि राज्यमन्त्री वलीलाई अहिले घोराहीतर्फ लगिएको बताइएको छ । उनलाई जिल्ला प्रहरी कार्यालय लगिने तयारी गरिएको छ । प्रहरीले दुवै पक्षलाई राखेर छलफल गर्ने र थप कुरा बुझ्ने भनिए पनि नाराबाजीसहित प्रदर्शन भएपछि तुलसीपुरमा छलफलको वातावरण नबनेको बताएको छ ।
राज्यमन्त्री वली लु १ झ ५३७ नम्बरको सरकारी गाडी चढेर एकराज बस्नेतको घर पुगेकी थिइन् । घटना हुँदा एकराज घरमा नभएको बताइएको छ ।
एकराजकी श्रीमती मीना भण्डारीले राज्यमन्त्री वलीले उनको घरमा आएर एकराज आफ्नो श्रीमान् भएको दाबी गरेको बताइन् । उनका अनुसार आफू र आफ्नी छ वर्षीया छोरीलाई वलीले हातपात गरेकी थिइन् ।
यसैबीच प्रदेश सरकारको राज्यमन्त्रीबाट उनलाई बर्खास्त गर्ने तयारी भएको बताइएको छ ।
