काठमाडौँ । नेकपा (एमाले) की सांसद नवीना लामाले जनक शिक्षा सामग्री केन्द्र लिमिटेड खारेज गर्न माग गर्नुभएको छ ।
प्रतिनिधिसभाको आजको बैठकको शून्य समयमा उहाँले समयमै पाठ्यपुस्तक पठाउन नसकेको जनक शिक्षालाई खारेज गर्दै पाठ्यपुस्तक छाप्ने जिम्मा निजी क्षेत्रलाई दिनुपर्ने माग गर्नुभयो ।
जनक शिक्षा सामग्रीलाई बचाउने नाममा विद्यार्थीहरुले समयमा कहिल्यै पुस्तक नपाएको भन्दै अहिले पनि कक्षा ६ र ८ को पुस्तक अभाव रहेको बताउनुभयो । उहाँले प्रश्न गर्नुभयो, “यदि छाप्न र वितरण गर्न नसक्ने हो भने जनक शिक्षा सामग्री किन चाहियो ?”, उहाँले प्रश्न गर्दै भन्नुभयो, “सरकारले किन पैसा दिइरहने ? खारेज गरौँ ।”
कागज ल्याउने ठेक्का लिनेले किन कागज ल्याउन नसकेको भन्दै उहाँले बेलैमा कागज किन्न नसक्ने र छाप्न नसक्ने जनक शिक्षा सामग्रीलाई कारबाही गर्नुपर्ने माग गर्नुभयो । सांसद लामाले वैकल्पिक उपाय खोजेर भए पनि अब पुस्तक छाप्ने काम निजी क्षेत्रलाई दिनुपर्ने बताउनुभयो ।
