काठमाडौँ । काठमाडौँ उपत्यका अपराध अनुसन्धान कार्यालयले पुतलीसडकमा मुख्य कार्यालय रहेको योयोसो सुपरमार्केट प्रालिका विभिन्न शाखा कार्यालयबाट सरसामान चोरी गर्ने व्यक्तिलाई पक्राउ गरेको छ ।
पक्राउ पर्नेमा काठमाडौँ–९ गौशाला घर भई हाल काठमाडौँ–४ चन्डोल बस्ने ५१ वर्षीय मुना सिंह रहेको प्रहरीले जनाएको छ ।
निज सिंहले योयोसो सुपरमार्केटको विभिन्न शाखा कार्यालयबाट सामान किन्ने बहाना बनाई डिपार्टमेन्ट स्टोरमा प्रवेश गरेर विभिन्न सरसामान चोरी गरेको कार्यालयले जनाएको छ ।
प्रहरीले निजबाट जीजी कम्पनीको हात पंखा एक थान, एम लेखिएको सानो हाते पंखा एक थान, हुक चार थान, उडन मिरर लेखिएको ऐना एक थान बरामद गरेको छ । साथै प्रहरीले निज सिंहबाट टाबेल नौ थान, जेन्स अन्डरवेयर तीन थान, स्पिकर एक थान, प्रदेश ३—२–००६ प ४३१७ नम्बरको यामाहा स्कुटर एक थान र मोबाइल एक थान पनि बरामद गरेको छ ।
निजलाई आवश्यक कारबाहिका लागि जिल्ला प्रहरी परिसर काठमाडौँ पठाइएको प्रहरीले जनाएको छ ।
