यू–१९ विश्वकप एसिया छनोट : कतारालाई हराउँदै नेपालको विजयी सुरुआत
काठमाडौँ । नेपालले आईसीसी यू–१९ विश्वकप एसिया छनोट खेलमा विजयी सुरुआत गरेको छ । आज बिहान मलेसियामा भएको खेलमा नेपालले कतारलाई ७९ रनले पराजित गरेको हो ।
सुरुमा ब्याटिङ गरेको नेपालले २० ओभरमा तीन विकेटको क्षतिमा ११७ रन बनाएको थियो । नेपालका लागि आशा पुलामी मगर ३२ र श्रृष्टि जैसी २३ रनमा अविजित रहे । त्यस्तै सानु राजवंशीले २१ र अन्जली विश्वकर्माले ११ रन जोडे ।
जवाफमा ११८ रनको लक्ष्य पछ्याएको कतार १५ दशमलव ४ ओभरमा ३८ रनमा अलआउट भयो । नेपालका लागि बलिङमा श्रृष्टि जैसीले ३ विकेट लिइन् । त्यस्तै स्नेहा महरा, कृतिका मरासिनी र अनु कडायतले २–२ विकेट लिए ।
छ राष्ट्र सहभागी प्रतियोगिताको शीर्ष स्थानमा रहने टिमले अर्को वर्ष दक्षिण अफ्रिकामा हुने विश्वकपमा स्थान बनाउने छ । प्रतियोगितमा नेपाल बाहेक मलेसिया, संयुक्त अरब इमिरेट्स (यूएई), थाइल्यान्ड, भुटान र कतार सहभागी छन् ।
खेल तालिकाअनुसार नेपालले शनिबार यूएई, सोमबार भुटान, मंगलबार थाइल्यान्ड र बिहीबार मलेसियासँग खेल्ने तालिका छ ।
