शाङ्घाईः चीनको प्रमुख व्यापारिक शहर शाङ्घाईमा कोरोनाभाइरस नियन्त्रणका लागि भन्दै गरिएको लकडाउन हटेको छ । कोरोनाभाइरस फैलिएसँगै चीनले शाङ्घाईमा दुई महिनादेखि लकडाउन गरेको थियो ।
अधिकारीहरुले लकडाउन मंगलबार मध्यरातिदेखि हटाएको घोषणा गरेका थिए । अब यहाँका मानिसले निर्वाध रुपमा घुमफिर गर्न पाउने छन् ।
साङ्घाईमा झण्डै २ करोड ५० लाख मानिस बस्ने गर्दछन् ।
तर शहरका कतिपय भागमा कोरोना संक्रमण अझै देखिएको भन्दै मानिसलाई घुमफिर गर्न नदिइने अधिकारीहरुको भनाई छ । यसबाट झण्डै ६ लाख ५० हजार मानिस प्रभावित हुनेछन् ।
चीनले “कोभिड शून्य” नीति लिएको र त्यो अझै कायम छ । कोभिड देखिएका व्यक्तिलाई तत्कालै क्वारेन्टिन वा अस्पतालमा भर्ना गरिन्छ । यस्तै कुनै कोभिड संक्रमित व्यक्तिको सम्पर्कमा रहेका व्यक्तिलाई पनि क्वारेन्टिनमा राख्ने र स्थानीय समूदाय तत्कालै लकडाउनमा जानु पर्ने नियम कायमै छ ।
शाङ्घाई सरकारका प्रवक्ता यिन सिनले पत्रकारहरुसँग कुरा गर्दै लामो प्रतिक्षा पछि यो दिनको घोषणा गर्न पाएकामा खुशी व्यक्त गरिन् । उनले शाङ्घाईका सबै जनताले ठूलै त्याग गरेको र आगामी दिनमा पनि सबैले सहयोग गर्ने विश्वास व्यक्त गरिन् ।
तर अझै पनि त्यहाँ केही नयाँ नियमहरु लागू गरिएको छ । स्थानीयवासीले कतै जाँदा आफ्ना स्मार्टफोनमा हरियो स्वास्थ्य कोड भएको देखाउनु पर्नेछ । सार्वजनिक यातायात वा बैंक, मल जाँदा ७२ घण्टे पिसिआर परीक्षणको रिपोर्ट देखाउनु पर्नेछ । शाङ्घाई शहर छाडेर अन्यत्र जान भने प्रतिबन्ध लगाइएको छ ।
अर्को शहर गएका व्यक्ति पुनः शाङ्घाई प्रवेश गरे ७ देखि १४ दिनको क्वारेन्टिनमा बस्नु पर्ने नियम लागू गरिएको छ ।
तैपनि मानिसहरुले शहरभित्रै घुमफिर गर्न पाएकामा पनि खुशी व्यक्त गरेका छन् ।
