काठमाडौँ । तारा एयरको ट्विनअटर विमान दुर्घटनामा परेका १६ जनाको शव फेला परेको छ । मुस्ताङका प्रमुख जिल्ला अधिकारी नेत्रप्रसाद शर्माका अनुसार विमानमा सवार अन्यको खोजी भइरहेको छ ।
आइतबार बिहान पोखराबाट जोमसोमतर्फ उडेको विमान जोमसोम विमानस्थलमा अवतरण हुन नपाई हराएको थियो । सो विमानको हिजैदेखि खोजी अभियान थालिए पनि प्रतिकूल मौसमका कारण फेला परेको थिएन । आज बिहान मुस्ताङको मानापाथी हिमालको फेदमा दुर्घटनाग्रस्त अवस्थामा सो विमान फेला परेको थियो ।
यार्सागुम्बा टिप्न गएका स्थानीयवासीले सो विमान फेला पारेका थिए । नेपाली सेना र नेपाल प्रहरीको टोली अहिले सो स्थलमा पुगी उद्धार र खोजी कार्य गरिरहेको बताइएको छ । विमानमा १९ यात्रु र चालक दलका तीन सदस्य रहेका थिए ।
