काठमाडौ । डाक्टर प्रिती भुषाल सहितको टोलीले आज विहान सगरमाथाको सफल आरोहण गरेको छ । समसामयिक महत्वपूर्ण तीन सन्देशहरू सर्वोच्च शिखर मार्फत विश्वभर प्रवाह गर्ने लक्ष्य सहित डाक्टर प्रितीको टोली करीब तीन साता अघि आरोहण अभियान शुरु गरेको थियो ।
कोभिड—१९ को लडाई विरुद्ध अग्रपङ्तिमा रहेका चिकित्सक, फर्मासिष्ट, नर्स, अस्पताल प्रशासनका कर्मचारी, सरसफाइमा खटिने मजदुर, एम्बुलेन्स चालक, सामाजिक कार्यकर्ताहरू लगायतको योगदानको उच्च सम्मान गर्न आफूले सगरमाथा आरोहण गरेको डाक्टर भुषालले बताइन्। ।
त्यस्तै प्रकृतिमा जलवायु परिवर्तनको असर कम गर्नुको विकल्प नरहेको सन्देश दिनु पनि आफ्नो सगरमाथा आरोहणको दोस्रो लक्ष्य रहेको डाक्टर भुषालले बताइन् । हिमालय क्षेत्रमा बढ्दो प्रदुषण रोकौं भन्ने सन्देश विश्वभर छर्नका लागि एक जिम्मेवारी पर्वतारोहीको रूपमा आफूले सगरमाथा आरोहण गरेको भुषाल बताउँछिन् ।
अर्घाखाँची स्थायी घर भई हाल राजधानीको बाँसबारीमा बस्दै आएकी भुषाल सानैदेखि हिमाल आरोहणमा विशेष रुची राख्थिन् । भुषालले गत वर्ष ६ हजार १ सय १९ मिटर अग्लो लोबुचे शिखरको सफल आरोहण गरेकी थिइन् ।
