एजेन्सी । आईपीएल २०२२ अन्तर्गत दिल्ली क्यापिटल्स र कोलकाता नाइट राइडर्सबीचको दोस्रो भिडन्तमा ऋषभ पन्तको टोली श्रेयस अय्यरको टोलीमाथि हाबी भएको छ ।
दिल्लीले कोलकातालाई चार विकेटले पराजित गर्दै सिजनको चौथो जित निकालेको हो । योसँगै दिल्ली अंक तालिकाको छैठौं स्थानमा उक्लिएको छ । उता, यो हारपछि कोलकाताका लागि प्लेअफको बाटो झनै कठिन भएको छ । अहिले यो टोली प्लेअफमा पुग्न भाग्यमा भर परेको छ ।
खेलमा पहिले ब्याटिङ गरेको कोलकाताले १४६ रन बनाएको थियो । जवाफमा दिल्लीको टोलीले १९ ओभरमा ६ विकेट गुमाएर १५० रन बनाई खेल जितेको हो । दिल्लीका लागि डेभिड वार्नरले ४२ रन बनाए । जबकि कुलदीप यादवले चार विकेट लिए ।
दिल्लीको पाँच विकेट खसेपछि कोलकाताले पुनरागमन गर्ने मौका पाएको थियो तर अक्षर पटेलले १७ बलमा २४ रन बनाएर आफ्नो टोलीको जित लगभग सुनिश्चित गरिदिए । यसपछि रोभम्यान पावेलले १६ बलमा ३३ रनको तुफानी इनिङ्स खेल्दै खेलको अन्त्य गरे । उनले तीन छक्का र एक चौका प्रहार गरे ।
डेभिड वार्नर र ललित यादवबीचको अर्धशतकीय साझेदारीपछि कोलकाताको टोली खेलबाट झण्डै बाहिरिसकेको थियो तर उमेश यादवले आफ्नो स्पेलको अन्तिम दुई ओभरमा दुई विकेट लिएर आफ्नो टोलीलाई फिर्ता गराए । उनले पहिले डेभिड वार्नर र त्यसपछि कप्तान पन्तलाई आउट गरेर दिल्लीलाई ब्याकफुटमा धकेले । यसैबीच नरिनले ललित यादवलाई सेटबाट आउट गरेर कोलकातालाई खेलमा फर्काए । उनले आईपीएलमा आफ्नो १५० विकेट पनि पूरा गरेका छन् । उमेशले चार ओभरमा २३ रन दिएर तीन विकेट लिए ।
१४७ रनको सहज लक्ष्य पछ्याएको दिल्लीको सुरुवात निकै खराब रह्यो । इनिङ्सको पहिलो बलमा पृथ्वी शा खाता नखोली नै पेभिलियन फर्किए । त्यसपछि अर्को ओभरमा मिचेल मार्स पनि आउट भए । दिल्लीको टोली दुई ओभरमा दुई विकेट गुमाएर संघर्ष गरिरहेको थियो । यसपछि चौथो नम्बरमा ब्याटिङ गर्न आएका डेभिड वार्नर र ललित यादवले इनिङ्सलाई सम्हालेका थिए । यी दुईबीच ६५ रनको साझेदारी भयो । वार्नर २६ बलमा ४२ रन बनाएर आउट भए पनि आफ्नो टोलीका लागि खेल निकै सहज बनाएका थिए ।
टस हारेर ब्याटिङ रोजेको कोलकाताको सुरुवात निकै खराब रह्यो । टोलीका दुवै ओपनर पावरप्ले भित्रै पेभिलियन फर्किएका थिए । पहिलो ६ ओभरमा कोलकाताको टोलीले दुई विकेट गुमाएर २९ रन मात्रै बनाउन सकेको थियो । फिन्च तीन र भेंकटेश अय्यरले ६ रन बनाएर आउट भए । यसपछि बाबा इन्द्रजित र सुनिल नारायण पनि सस्तोमा पेभिलियन फर्किए । श्रेयस अय्यर र नितिश राणाले मिलेर पारीलाई सम्हालेका थिए । श्रेयस ४२ र राणा ५७ रन बनाएर आउट भए । यी दुई ब्याट्सम्यान बाहेक रिंकु सिंहले मात्र दोहोरो अंक छुन सके । उनले १६ बलमा २३ रन बनाए । यसबाहेक कोलकाताका आठ ब्याट्सम्यानले दोहोरो अंक छुन सकेनन् । तीन खेलाडी शून्य रनमा आउट भए ।
दिल्लीका लागि कुलदीप यादव र मुस्ताफिजुर रहमानले उत्कृष्ट बलिङ गरे । कुलदीपले तीन ओभरमा १४ रन दिएर चार ब्याट्सम्यानलाई आउट गर्दै आफ्नो आईपीएल करियरकै उत्कृष्ट प्रदर्शन गरे । अर्कोतर्फ मुस्ताफिजुर रहमानले चार ओभरमा १८ रन दिएर तीन विकेट लिए । आफ्नो पहिलो दुई ओभरमा उनले आठ रन मात्र दिए । त्यसपछि अन्तिम ओभरमा उनले तीन विकेट लिए र दुई रन मात्र दिए । यी दुई बाहेक अक्षर पटेल र चेतन साकारियाले एक एक विकेट लिए । जसका कारण कोलकाताको टोलीले २० ओभरमा ९ विकेट गुमाएर १४६ रन मात्रै बनाउन सकेको थियो ।
