एजेन्सी । आईपीएल २०२२ को ३९ औं खेलमा राजस्थान रोयल्सले रोयल च्यालेन्जर्स बैंगलोरलाई २९ रनले पराजित गरेको छ । यो जितसँगै राजस्थानले बैंगलोरसँग अघिल्लो खेलको बदला पनि लिएको छ ।
सोही सिजनमा दुई टोलीबीचको अन्तिम खेलमा बैंगलोरले राजस्थानलाई चार विकेटले पराजित गरेको थियो । टस हारेर पहिले ब्याटिङ गरेको राजस्थानले २० ओभरमा आठ विकेट गुमाएर १४४ रन बनायो ।
रियान परागले ३१ बलमा तीन चौका र चार छक्का प्रहार गर्दै अविजित ५६ रनको इनिङ्स खेले । जवाफमा बैंगलोरको टोली १९.३ ओभरमा ११५ रन बनाएर अलआउट भयो । राजस्थानका लागि कुलदीप सेनले ४ विकेट लिए । यस्तै रविचन्द्रन आश्विनले तीन विकेट लिए ।
यो जितसँगै राजस्थानको टोली अंक तालिकाको पहिलो स्थानमा पुगेको छ । टोलीले अहिलेसम्म ८ खेलमध्ये ६ खेल जितेको छ । टोली दुई हार र १२ अंकसहित शीर्ष स्थानमा छ । नेट रन रेटमा राजस्थानको टोली गुजरातभन्दा अगाडि छ । यस्तै रोयल च्यालेन्जर्स बैंगलोर ९ खेलमा ५ जित र ४ हारसहित अंक तालिकाको पाँचौं स्थानमा छ । उसको १० अंक छ ।
टस हारेर पहिले ब्याटिङ गरेको राजस्थानको सुरुवात खराब रह्यो । देवदत्त पडिक्कल सात रन बनाएर आउट भए । त्यसपछि रविचन्द्रन अश्विन तेस्रो नम्बरमा ब्याटिङ गर्न आए र पहिलो दुई बलमा दुई चौका प्रहार गरे । तर, उनी लामो समय मैदानमा टिक्न सकेनन् र नौ बलमा १७ रन बनाएर आउट भए ।
उत्कृष्ट लयमा रहेका जोस बटलर ९ बलमा आठ रन बनाएर आउट भए । कप्तान सञ्जु सामसन २१ बलमा २७ रन बनाएर आउट भए । डेरिल मिचेल २४ बलमा १६ रन, शिमरोन हेटमायर ७ बलमा ३ रन र ट्रेन्ट बोल्ट ७ बलमा ५ रन बनाएर आउट भए । प्रसिद्ध कृष्ण दुई रन बनाएर आउट भए ।
यस क्रममा रियान परागले रन बनाउने क्रम जारी राखे । उनले आफ्नो आईपीएल करियरको दोस्रो अर्धशतक २९ बलमा बनाए । परागले ३१ बलमा ५६ रनको अविजित इनिङ्स खेले । जसमा तीन चौका र चार छक्का समावेश थिए । राजस्थानले अन्तिम दुई ओभरमा ३० रन बनाएको थियो । यससँगै राजस्थानले अन्तिम ५ ओभरमा तीन विकेट गुमाएर ४४ रन बनायो । बैंगलोरका लागि मोहम्मद सिराज, जोस हेजलउड र वनिन्दु हसरंगाले २–२ विकेट लिए भने हर्षल पटेलले एक विकेट लिए ।
१४५ रनको लक्ष्य पछ्याएको बैंग्लोरको टोलीले खराब सुरुवात गरेको थियो । विराट कोहली र कप्तान फाफ डु प्लेसिस ओपनिङका लागि आए । कोहलीले इनिङ्सको पहिलो ओभरमा ट्रेन्ट बोल्टलाई दुई चौका प्रहार गरे तर अर्को ओभरमा उनले आफ्नो विकेट प्रसिद्ध कृष्णलाई दिए । उनलाई कृष्णले रियान परागबाट क्याच आउट गराए । कोहलीले १० बलमा ९ रन बनाउन सके । यसपछि कुलदीप सेनले बैंगलोरलाई दुई ठूला झट्का दिए ।
सातौं ओभरमा कुलदीपले कप्तान फाफ डु प्लेसिस र ग्लेन म्याक्सवेललाई लगातार दुई बलमा पेभिलियन पठाए । डु प्लेसिस २१ बलमा २३ र म्याक्सवेल शून्य रनमा आउट भए । रजत पाटीदार १६ बलमा १६ रन बनाएर आउट भए भने सुयश प्रभुदेसाईले ७ बलमा २ रन बनाए । दुवैलाई रविचन्द्रन अश्विनले पेभिलियन पठाए । १३ औं ओभरमा दिनेश कार्तिकलाई युजभेन्द्र चहलले रन आउट गरेपछि खेलको टर्निङ प्वाइन्ट आयो ।
यस सिजनको अन्तिम खेलमा राजस्थान र बैंगलोरबीचको खेलमा कार्तिकले खेल उल्टाए । यो खेलमा पनि उनी यस्तै लयमा देखिएका थिए । उनी आउने बित्तिकै उनले बाउन्ड्री प्रहार गरे तर चहलले १३ औं ओभरमा कार्तिकलाई रन आउट गरे । कार्तिक चार बलमा ६ रन बनाएर आउट भए । त्यसपछि अशबाजले शाहबाज अहमदलाई परागको हातमा क्याच आउट गराएर पेभिलियन पठाए । शाहबाजले २७ बलमा १७ रन बनाउन सके ।
वनिन्दु हसरङ्गा १३ बलमा १८ रन र मोहम्मद सिराजले ५ बलमा ५ रन बनाएर आउट भए । कुलदीपले हर्षल पटेललाई परागको हातमा क्याच गराए । राजस्थानले बैंग्लोरको इनिङलाई ११५ रनमा समेट्यो । हर्षलले ११ बलमा आठ रन बनाउन सके । यसरी बैंगलोरको टोलीले लगातार दोस्रो हार बेहोरेको छ । यसअघि भएको खेलमा सनराइजर्स हैदरावादले बैंगलोरलाई ९ विकेटले पराजित गरेको थियो ।
आजको खेलः गुजरात टाइटन्सविरुद्ध सनराइजर्स हैदराबाद – ७ः४५ बजे
