काठमाडौ । नेकपा(माओवादी केन्द्र)का अध्यक्ष पुष्पकमल दाहाल प्रचण्डले पार्टीको क्रान्तिकारी चरित्र र क्रान्तिकारी कार्यशैलीमा ह्रास आएको बताउनुभएको छ । अध्यक्ष प्रचण्डले बिहीवार अखिल क्रान्तिकारीको २२ औँ राष्ट्रिय सम्मेलनलाई सम्बोधन गर्दै पार्टीको क्रान्तिकारी चरित्रमा ह्रास आएको बताउनुभएको हो । विगतमा सामाजिक रुपान्तरण, क्रान्ति र परिवर्तनको निम्ति काम गर्ने पार्टी नेता कार्यकर्ताहरुको कार्यशैलीमा स्खलन भएको उहाँले बताउनुभयो । पार्टीका नेताहरु पद, प्रतिष्ठा, पैसा र कमिशनको निम्ति मरिहत्ते गर्ने भन्दै उहाँले पार्टीभित्र अवसरवादी चरित्र मौलाएको बताउनुभयो । जो नेता जतिधेरै माथि भयो उतिधेरै स्खलित भएको उहाँको भनाई छ । पार्टीबाट जति धेरै मन्त्री बने उनीहरु नै पतन भएको भन्दै अध्यक्ष प्रचण्डले पार्टीमा रुपान्तरणको खाँचो रहेको औँल्याउनुभयो ।
उहाँले भन्नुभयो – ‘हामी बिस्तारै विस्तारै थाहै नपाइकन गएको दश पन्ध्र वर्ष यता हाम्रो क्रान्तिकारी चरित्रमा ह्रास आएको छ । हामी हिजो सामाजिक रुपान्तरणको निम्ति, क्रान्तिको निम्ति, परिवर्तनको निम्ति, उत्पादनको निम्ति जनताको निम्ति काम गर्ने हाम्रो क्रान्तिकारी कार्यशैलीमा स्खलन भएको छ । र हामी बिस्तारै विस्तारै थाहै नपाईकन हिजो क्रान्तिकारी आन्दोलनलाई, जनयुद्ध र जनआन्दोलनलाई दबाउन सरकारमा बसेका पार्टीहरुले जेजस्ता हत्कण्डा अपनाउथे बिस्तारै हामी उस्तै उस्तै हुँदै जाने खतरा पैदा हुन थालेको छ ।
हामीपनि पदको निम्ति, प्रतिष्ठाको निम्ति, पैसाको निम्ति, कमिशनको निम्ति, दलाल पुँजिपतिहरुसँग, नोकरशाहसँग उनीहरुको हितहरु प्रति बढी संवेदनशिल हुने आफ्नै वर्गलाई बिर्सने जस्तो । जो जति माथि नेतृत्वमा पुग्यो त्यो त्यतिधेरै अवसरवादी । जो जतिधेरै मन्त्री भयो त्यो त्यतिधेरै । जसलाई धेरै मन्त्री बनाएँ मैले पार्टीबाट ति पतन भए । जो जति माथि आयो त्यो त्यति दलालहरुसँग एकाकार भएर गयो । जता सँग सम्बन्ध बिच्छेद भएजस्तो भयो ।’
अध्यक्ष प्रचण्डले विगतमा नेपाल कम्युनिष्ट पार्टी(नेकपा) रहँदा तत्कालीन पार्टीका अर्का अध्यक्ष केपी शर्मा ओली सँगको लडाइँ जिवन मरणको लडाइँ भएको स्मरण गर्नुभयो । त्यतिखेर आफु आत्महत्या गर्ने कि लडाइँ लड्ने भन्ने अवस्थामा रहेको भन्दै उहाँले जोखिम उठाएर क्रान्तिकारी ढंगले लड्ने संकल्पसाथ लडेको उल्लेख गर्नुभयो । उहाँले केपी ओलीमाथि विजय प्राप्त गरेको पनि बताउनुयभो ।
उहाँले भन्नुयो – ‘मेरो अगाडी अब फेरी लडाइँ गर्ने कि, आत्मसमर्पण त मैले गर्न सक्दिनँ । गर्न हुँदैन । हजारौँ सहिदहरु, हजारौँ बेपत्ता योद्धाहरु, घाइते, अपांगहरुको सबै ऋण त मुख्य रुपमा त मेरो टाउकोमा छ । या त, मैले याद सकिन मैले यत्ति नै रहेछ भनेर आफुले आफैँलाई सुसाइड गर्नुपर्ने ।
- सुसाइड सबै नराम्रो मात्रै हुँदैन है साथी हो । मार्क्सको ज्वाई छोरी सबैले सुसाइड गरेको कथा सायद तपाईहरुले पढ्नुभएको होला । सबै सुसाइड गलतै हुन्छ भन्ने हुँदैन । या त लड्नुपर्ने । अब लड्ने कि मर्ने ? फेरि पनि मृत्यू या मुक्तिको ठाउँमा पुगेको देखेँ मैले । पार्टी भित्र पनि र पार्टी बाहिर पनि । र अन्तिममा पार्टी भित्रका सबै साथीहरुको सहयोगबाट हामी फेरी लड्ने क्रान्तिकारी ढंगले लड्ने । पुरा जोखिम उठाएर लड्ने । जेल जानुपर्छ भने जाने । मारिनुपर्छ भनेपनि तयार हुने । तर प्रतिक्रान्ति र प्रतिगमनको अगाडी हरहालतमा नझुक्ने भन्ने हामीले संकल्प गरियो । त्यही संकल्पबाट शुरु भयो सडक आन्दोलन । ’
अध्यक्ष प्रचण्डले वर्तमान निर्वाचन प्रणाली खर्चिलो भएका कारण चुनाव लड्न नसक्ने स्थिति आएको भन्दै पूर्ण समानुपातिक निर्वाचन प्रणाली बनाउनुपर्ने बताउनुभयो । यसका निम्ति सडकबाटै जनताले दबाब दिनुपर्ने पनि उहाँले बताउनुभयो । उहाँले गाउँघरमा केपी ओली र कमल थापाहरुको आतंक भएको भन्दै ति आतंकलाई परास्त गर्न नेता, कार्यकर्तालाई आग्रह गर्नुभयो । अध्यक्ष प्रचण्डले पार्टीभित्र आफुविरुद्धमा गुटबन्दी बनाउने कोसिस भइरहेको भन्दै आफु नेतृत्व छाड्न तयार नभएको स्पष्ट पार्नुभयो ।
उहाँले अहिलेको अवस्थामा पार्टी थेग्न सक्ने कोही नदेखेको भन्दै विचार, योजना र कार्यक्रमसहित आउनेलाई नेतृत्व छोड्न तयार रहेको उल्लेख गर्नुभयो । तर उत्तराधिकारी अहिले नै घोषणा नगर्ने उहाँको भनाई छ । उहाँले भन्नुभयो – ‘आज प्रतिक्रियावादीहरु खुलेआम गाउँघरमा टोलटोलमा उनीहरुको आतंक छ । वाइसियल आतंक छैन । माओवादी आतंक छैन अहिले । अहिले त केपी आतंक । ओली आतंक । जसले गणतन्त्र रोक्नका लागि लड्यो त्यसको पो आतंक छ हामी माथि । के अचम्म भयो यो ? कमल थापा आतंक । कहाँबाट कहाँ पुगेकाहरु चाहीँ तिनीहरुको पो आतंक छ । अनि हामीलाई टुक्राटुक्रा पा¥यौँ भनेर उनीहरु दंग परेका छन् । पोहोर यो विघटन गर्ने बेलामा माओवादी अब सिद्धियो भन्ने र प्रचण्डको अब केही मुल्य छैन । हुँदाहुँदा त भित्रकै साथीहरुले भन्न थाले अब प्रचण्डबाट केही माखो मर्दैन भन्छन् ।
मलाई त अनौठो लाग्छ हेर्नुस् । साथीहरुले नै भनेको सुन्छु मैले । मेरै अगाडी त भन्दैनन् । मेरो अगाडी त तपाई नै हो तपाई बाहेक कोही छैन भन्छन् । तर पछाडी गएर अब प्रचण्डबाट केही हुँदैन है अब हामीले अर्को तयारी । साच्चै गरिदिने साथी भए, यसले सबैलाई समेटेर लाने भयो भने त हेर्नुस् म त बसेर किताब लेख्न पाए म सबभन्दा खुशी हुन्थे । तर यसो हेर्छु छाँट । त्यसपटक यो लास्ट अबसर एकचोटी म लडाइँ लड्छु ।
त्यसो भन्ने साथीहरुलाई म सहृदयतापूर्वक तपाईहरु विचार योजना र कार्यक्रमसहित आउनुस् । तपाईको राम्रो भयो र पार्टीले पास ग¥यो भने तपाईलाई धन्यवाद दिएर उत्तराधिकारी घोषणा गरेर हिड्छु म चाहीँ । तर माओले लिनप्याओलाई गरेको जस्तो अहिले नै भन्दिने जस्तो गल्ती चाहीँ म चाहीँ गर्दिन । लिनप्याओलाई उत्तराधिकारी भनेको त त्यही लिनप्याओले माओलाई गोलि हान्न हिड्यो । उत्तराधिकारी भनेपछि त त्यो त काल रहेछ । म किन भन्ने म त्यो भन्दिनँ । राम्रो काम गरेर आउने साथीहरुलाई मैले बाटो छोडिदिन्छु भनिराखेकै छु मैले । त्यसकारण एकपटक हामी जाग्नुप-यो भन्ने हो ।’
अध्यक्ष प्रचण्डले विगतमा एमालेको माधव नेपाल पक्षधर रहेका र नेपालले पार्टी विभाजन गर्दा साथ नदिएका १० जना नेताहरुले आफुलाई केपी ओलीविरुद्ध लड्न आग्रह गरेको भएपनि उनीहरुले नै ओलीसँग आत्मसर्मपण गरेको बताउनुभयो । आफुलाई एमाले फुटाएको आरोप लगाएको भन्दै उहाँले विगतमा तिनै दश नेताहरुसहिको बैठकले केपी ओलीलाई कारबाही गरेको तर्फ ति नेताहरुलाई स्मरण गराउनुभयो ।
उहाँले भन्नुभयो – ‘केही साथीहरु अहिले केपीसँग आत्मसमर्पण भन्नेकी के भन्ने गर्नुभाछ । अस्तिसम्म त उहाँहरुले मलाई दह्रोसँग उभिनुस् कमरेड तपाईको पछाडी हामी छौँ यो केपी तानाशाह नै हो । यो षड्यन्त्रकारी नै, अपराधी नै हो भन्थे ति दश भाई । अहिले त लुत्रुक्क परेर प्रचण्डले एमाले फुटाउन खोज्ने अरे मलाई गाली । होइन उहाँहरु पनि बसेर केपीलाई पार्टीबाट निकालेको होइन ? भन्छु म । केपीलाई निकाल्ने बेलामा त ति दशभाई पनि थिए केन्द्रीय समितिमा । पार्टीबाटै निकाल्दा सहि गरेका छन् । उनीहरुको सही माइन्युट नै छ । अनि मैले पार्टी फुटाउन खोजेको एमाले भन्न मिल्छ त ? तर भन्छन् । भन्ने त बेइमान भए भए सुन्ने र ताली लगाउने देखेर हैरान हुन्छ ।’
अध्यक्ष प्रचण्डले युवा तथा विद्यार्थीहरुलाई विकृति र विसंगतिका विरुद्ध तथा प्रतिगमन र प्रतिक्रान्तिको विरुद्ध आक्रमक ढंगले प्रस्तुत हुन निर्देशन समेत दिनुभयो ।
