काठमाडौँ । यो साताको कारोबार भएको तेस्रो दिन नेप्से परिसूचकमा सामान्य वृद्धि भएको छ ।
मंगलबार नेप्से परिसूचक १३.३७ अंक बढेर २३५७.२४ विन्दुमा पुगेको छ । त्यस्तै, सेन्सेटिभ इण्डेक्स ३.६१ अंक बढेको छ भने फ्लोट इण्डेक्स ०.८६ अंक र सेन्सेटिभ फ्लोट इण्डेक्स १.२० अंकले बढेको छ ।
मंगलबार कारोबारमा आएका २२९ कम्पनीको ३२ लाख १३ हजार कित्ता शेयर १ अर्ब ३२ करोड ६८ लाख ६५ हजार रुपैयाँ बराबरको खरिदबिक्री भएको छ । नेप्से परिसूचक उकालो लागे पनि सोमबारको तुलनामा मंगलबार कारोबार रकम भने गिरावट आएको छ । सोमबारको कारोबारमा डेढ अर्बभन्दा बढीको शेयर कारोबार भएको थियो ।
नेप्सेका १३ उपसमूहमध्ये सबै उपसमूहको परिसूचकमा हरियाली भएको छ । मंगलबार १३ उपसमूहमध्ये अन्य उपसमुहको परिसूचक सबैभन्दा धेरै १.०९ प्रतिशत बढेको छ । त्यस्तै, होटल तथा पर्यटन उपसमूहको परिसूचक १.०४ बढेको छ । बाँमी सबै उपसमूहको परिसूचक शून्य प्रतिशत भन्दा बढीले बढेको छ ।
मंगलबारको कारोबारमा दुई कम्पनीको शेयर सकारात्मक सर्किट लेभलमा कारोबार भएको छ । जसमा नेष्डो समृद्ध लघुवित्त र ग्रीन भेन्चर्सको शेयर सकारात्मक सर्किट लेभलमा कारोबार भएको हो । त्यस्तै यता, दिव्यश्वरी हाइड्रोपावरको शेयरमूल्य सबैभन्दा बढी ८.८२ प्रतिशतले गिरावट आएको छ ।
कारोबार रकमका आधारमा ६ करोड ३० लाख ६७ हजार रुपैयाँ बराबरको शेयर खरिदबिक्री गरेर नबिल बैंक शीर्ष स्थानमा रहेको छ । हिमालयन डिष्टिलरीको ४ करोडभन्दा बढीको शेयर किनबेच भएको छ ।
