काठमाडौं । त्रिकोणात्मक टि–ट्वान्टी अन्तराष्ट्रिय क्रिकेट सिरिज अन्तर्गत पीएनजीले मलेसियालाई पराजित गरेको छ ।
कीर्तिपुरस्थित त्रिवि क्रिकेट मैदानमा भर्खरै सम्पन्न खेलमा पीएनजीले मलेसियालाई ८ ले हराएको हो ।
पीएनजीका लागि आशाद भाला र टोनी उराले अर्धशतकीय इनिङ्स खेले । ५१ बल फेस गरेका भालाले ७४ रन जोडे भने उराले ३४ बलमा ८६ रनको योगदानी दिए । विष्फोटक ब्याटिङ गरेका उराले १० छक्का र २ चौका प्रहार गरे ।
यस्तै, चाल्र्स आमिनीले २२ बलमा २८ रनको योगदानी दिए । मलेसियाका लागि मुहम्मद वफिक र स्याजरुल इड्रसले एक–एक विकेट लिए ।
त्यसअघि टस हारेर पहिला ब्याटिङ थालेको मलेसियाले निर्धारित २० ओभरमा ६ विकेट गुमाउँदै १९६ रन बनायो ।
मलेसियाका लागि सैद अजिजले सर्वाधिक ६४ रनको योगदान दिए । उनले ३५ बलमा ८ चौका र ३ छक्का प्रहार गरे । त्यस्तै कप्तान अहमद फैजले ६३ रनको योगदान दिए । उनले ४३ बल खेल्ने क्रममा ५ चौका र ३ छक्का हाने । जुबैद जुल्किफ्लीले २२ बलमा ४ चौका र ४ छक्कासहित ४६ रन तथा विरनदीप सिंह १५ बलमा एक चौकासहित १० रन बनाए ।
बलिङतर्फ पपुवा न्युगिनीका काबुआ मोरेआले ४ विकेट तथा चाद सोपर र राइली हेकुरेले एक/एक विकेट लिए ।
जारी सिरिजमा नेपाल तीन खेलमा जित निकाल्दै फाइनलमा प्रवेश गरिसकेको छ । नेपालले शनिबार चौथो खेल मलेसियासँग खेल्ने छ ।
