बंगलादेशविरुद्ध साउथ अफ्रिकाको शानदार जित

काठमाडौं । आईसीसी विश्वकप टी–ट्वान्टी क्रिकेट अन्तर्गत साउथ अफ्रिकाले बंगलादेशलाई हराएको छ ।

मंगलबार भएको खेलमा साउथ अफ्रिकाले बंगलादेशमाथि ६ विकेटको जित हात पारेको हो ।

बंगलादेशले दिएको ८५ रनको सामान्य लक्ष्य साउथ अफ्रिकाले ३९ बल अगावै ४ विकेट गुमाएर पुरा गर्यो ।

साउथ अफ्रिकाका लागि कप्तान टेम्बा बावुमाले नटआउट ३१ रन जोडे । ओपनर क्विनटन डी ककले १६ रन बनाएको इनिङ्समा अर्को ओपनर रिजा हेन्डरिक्स ४ रनमा आउट भए ।

रक्सी वेन डेर डुसनले २२ रन बनाए भने एडेन माक्राम शुन्य रनमा आउट भए ।

बंगलादेशका टास्किन अहमेदले २ तथा महेदी हसन र नसुम अहमदले एक/ एक विकेट लिए ।

यसअघि, अबुधावीमा टस हारेर पहिले ब्याटिङ थालेको बंगलादेश १८ ओभर २ बलमा अल आउट हुँदै जम्मा ८४ रन मात्र जोड्यो ।

बंगलादेशका लागि महेदी हसनले सर्वाधिक २५ बलमा २७ रन जोडे । लिटोन दासले २४ रनको योगदान गरे ।

दक्षिण अफ्रिकाका कगिसो राबाडा र एनरिच नोर्जले समान ३–३ विकेट लिए भने तबरेज सम्सीले २ विकेट लिएका थिए ।

जितसँगै साउथ अफ्रिका सेमिफाइनलको नजिक पुगेको छ । अफ्रिकाले ४ खेलबाट ६ अंक जोडेर तालिकाको दोस्रो स्थानमा उक्लिएको छ ।