वीरगञ्ज । सवारी दुर्घटनामा गम्भीर घाइते भएका बाराका प्रमुख जिल्ला अधिकारी गणेश भट्टराईलाई थप उपचारका लागि काठमाडौं लगिएको छ ।
वीरगञ्ज हेल्थ केयर अस्पतालमा भट्टराईको उपचार हुन नसकेपछि उनलाई ग्रान्डी अस्पतालको सहकार्यमा कैलास हेलिकप्टर सर्भिसेज हेलिकप्टरबाट काठमाडौं लगिएको हो ।
भट्टराईलाई लिन ग्रान्डी क्रिटिकल केयर स्पेसलिष्ट डा. अजय थापासहितको टोली काठमाडौँबाट आएका थिए ।
भट्टराई चढ्दै आएको जिल्ला प्रशासन कार्यालय बाराको ना१झ १६३३ नम्बरको गाडी शनिबार बेलुका दुर्घटना भएको थियो । कर्मचारी मिलन केन्द्र बाराले आयोजना गरेको पिकनीकमा सहभागी भइ निजगढबाट फर्कने क्रममा पसाहा पुल नजिकै हाईवेमा दुर्घटना भएको थियो । दुर्घटनामा सशस्त्र प्रहरी बल १२ नम्बर गणका गणपति सशस्त्र प्रहरी उपरीक्षक बलराम पोखरेलको मृत्यु भएको थियो ।
भट्टराईको राति टाउकोको शल्यक्रिया गरी जमेको रगत निकालेको थियो ।
दुर्घटनामा परेका प्रमुख जिल्ला अधिकारी भट्टराईका अंगरक्षक सञ्जय यादव, शम्भु गुरुङ र सवारी चालक जगत पटेलको भने वीरगञ्ज हेल्थ केयर अस्पतालमा नै उपचार भइरहेको छ ।
घाईते सबैको अबस्था सामान्य रहेको छ ।
