वीरगन्ज । मुलुकको समृद्धिका भन्दै वीरगन्जमा अश्वमेध गायत्री महायज्ञ आयोजना गरिएको छ। आदर्शनगर रंगशालामा आइतवारदेखि चार दिनको लागि अश्वमेध गायत्री महायज्ञ सुरु गरिएको हो ।
महायज्ञको उद्घाटन गर्दै अखिल विश्व गायत्री परिवारका अध्यक्ष एंव देव संस्कृति विश्वविधालय हरिद्वार भारतका कुलाधिपति डाक्टर प्रणव पाण्डेयाले नेपालको समृद्धिका लागि यो महायज्ञको आयोजना भएको बताए।
उद्घाटनअघि वीरगन्ज महानगरमा हजारौंको सहभागीतामा भव्य कलश यात्रा निकालिएको थियो। वीरगन्ज महानगरका ३२ वटै वडाबाट निकालिएको कलश यात्रा महायज्ञ आयोजनास्थल आदर्शनर रंगशालामा पुगेर सकिएको थियो।
आयोजकका अनुसार कलशयात्रामा करिब ६ हजार कन्या तथा १० हजार महिलागरी १५ हजारको सहभागिता थियो। महायज्ञको औपचारिक उद्घाटन आज भएपनि देवपूजन र हवन भने सोमबार विहानदेखि मात्र सुरु हुने आयोजकले जनाएको छ।
महायज्ञ स्थलमा निर्माण गरिएका दुइ सय ५१ वटा हवन कुण्डमा सोमबार बिहान आठ बजे देखि मध्यान्ह १२ बजे सम्म मु्ख्य यजमानहरुले देवपूजन र हवन गर्नेछन्।
