हेटौँडा । नेपाली कांग्रेसका सह-महामन्त्री डा. प्रकाशशरण महतले अबका सबै निर्वाचनमा काँग्रेसले स्पष्ट बहुमत ल्याउने दाबी गर्नु भएको छ । वाग्मती प्रदेश कांग्रेसको महाधिवेशनलाई बिहीबार हेटौँडामा सम्बोधन गर्दै डा. महतले तर यसका लागि नेपाली काँग्रेसका नेता तथा कार्यकर्ताहरुले अब अर्जुन दृष्टि राखेर काम गर्नुपर्ने बताउनुभयो ।
उहाँले भन्नुभयो- 'निर्वाचन जित्ने गरेर कांग्रेसका नेता कार्यकर्ता बीच अर्जुनदृष्टि राखेर जानुपर्छ, नेपाली जनताले काँग्रेस नै चाहेका छन्, अबको निर्वाचनमा पक्का पनि हामीलाई नै रोज्नेछन् ।'
कम्युनिष्टहरुले झण्डै दुई तिहाइ ल्याएर सरकार निर्माण गरेका भएपनि उनीहरुको सत्ताको झगडा र कुशासनले वाक्क भएका नेपाली जनताले दुई वर्षमै सरकारका काँग्रेसको नेतृत्व खोजेबाट यो कुरा प्रमाणित हुने उहाँको दाबी थियो । कम्युनिस्टको झुठको आस्वासन जनताले बुझिसकेका उहाँले बताउनुभयो । तर हामीले गरेका कामहरु जनतालाई बुझाउनुपर्ने उहाँको सुझाव थियो ।
सह(महामन्त्री डा. महतले भन्नुभयो, ‘आउने निर्वाचनलाई केन्द्रविन्दुमा राखेर काम गर्यौँ भने हाम्रो जित सुनिश्चित छ । कम्युनिस्टको नक्कली कुरालाई परास्त गर्न सक्नुपर्छ ।’
उहाँले कांग्रेसले लाखौं जनतालाई सक्रिय बनाएर महाधिवेशन गरेको यो अभ्यास संसारकै एक प्रजातान्त्रिक अभ्यास भएको उहाँको दाबी थियो । एमालेप्रति संकेत गर्दै नेता डा. महतले भन्नुभयो, ‘अरु दलहरूको पनि महाधिवेशन भएको छ । लोकतान्त्रिक प्रक्रिया गर्न दिइएन, हेरौँ न निर्वाचनमा उठ्न पाउने अधिकारकै लागि कति हंगामा भयो, तर हाम्रो हेरौँ त देशव्यापी रुपमा कति लोकतान्त्रिक अभ्यास भएको छ ?’
‘हामीले पार्टीमा लोकतान्त्रिक प्रक्रियालाई भरपुर अवसर दिएका छौँ । अधिवेशन गरेका छौँ’, सह-महामन्त्री डा. महतले ‘हाम्रो पार्टीको निर्वाचन प्रणाली चुनौती र अवसर दुबै हो ।’ सह-महामन्त्री डा. महतले कांग्रेसभित्र व्यक्ति होइन विचार केन्द्रित राजनीति अगाडि बढाउनुपर्छ र विचार तथा सिद्धान्तमा राजनीति गर्नुपर्छ भन्नुभयो ।
उहाँले भन्नुधयो, 'नेपाली जनताको आग्रहपछि नै सभापति शेरबहादुर देउवाले सरकारको नेतृत्व लिनु भएको भन्दै यो संयुक्त सरकार भएकाले हामीले चाहेजति काम गर्न नसक्ने अवस्था पनि हुनसक्छ, अर्को निर्वाचन जितेर हाम्रै सरकार बनेपछि देश विकासको अवसर जुट्ने बताउनुभयो । '
मकवानपुर जिल्लामा कमजोर रहेको कांग्रेस बलियो बनाएको भन्दै इन्द्रबहादुर बानियाँको प्रशंसा पनि उहाँले गर्नुभयो । सह-महामन्त्री डा. महतले आगामनी निर्वाचनमा बानियाँको नेतृत्वमा बाग्मती प्रदेशभरि कांग्रेसलाई सबै तहमा जिताउने बताउनुभयो ।
