काठमाडौँ । चिकित्सा शास्त्र अध्ययन संस्थान (आईओएम)को डीन कार्यालयमा सत्तारुढ विद्यार्थीहरु र स्वतन्त्र विद्यार्थी युनियनले तालाबन्दी गरेको छ ।
पोखरास्थित गण्डकी मेडिकल कलेज र किष्ट मेडिकल कलेजले विद्यार्थीहरुबाट फिरौतीको शैलीमा रकम असुलेको विषयमा विश्वविद्यालय र डीन कार्यालय मौन बसेको भन्दै अखिल र अखिल (क्रान्तिकारी) र स्ववियुले मंगलबार डीन कार्यालयमा तालाबन्दी गरेका हुन् ।
सरकारले काठमाडौँ बाहिरका मेडिकल कलेजका लागि एमबीबीएसका विद्यार्थीसँग ४२ लाख ४५ हजार तोकेको भए पनि गण्डकी मेडिकल कलेजले रसिदविनै १० देखि १५ लाखसम्म बढी रकम लिएपछि विद्यार्थी निरन्तर आन्दोलनमा छन् ।
७२ घण्टाभित्र माग पूरा नभए त्रिवि उपकुलपतिको कार्याल र डीन कार्यालयमा डीनलाई प्रवेश निषेध गर्ने र विश्वविद्यालयका पदाधिकारी र डीनको राजीनामा माग्ने चेतावनी विद्यार्थीले दिएका छन् ।
