डडेल्धुरा । धनगढीबाट बझाङ जाँदै गरेको यात्रु बहाक बस डडेल्धुराको साहुखर्कमा दुर्घटना हुँदा ५ जनाको मृत्यु भएको छ ।
बुधबार बिहान बिहान ५ बजेतिर ना ६ ख १८३१ नम्बरको यात्रुबाहक बस भिमदत्त राजमार्गको गन्यापधुरा गापा १ साहुखर्कमा दुर्घटनामा हुँदा उनीहरुको घटनास्थलमै मृत्यु भएको हो ।
मृत्यु हुनेमा बझाङको केदारस्यूका–४ का २५ वर्षीय नरेन्द्र गुरधामी, सोही ठाउँकी ५५ वर्षीय कल्सीदेवि गुरधामी, हरुली बोहरा, र २५ वर्षीय भारतीय नागरिक मोहोमद नासिर र तल्कोट–४ का ४४ वर्षीय धनबहादुर घर्ती रहेको डडेल्धुरा प्रमुख जिल्ला अधिकारी मोहनराज जोशीले जानकारी दिए।
दुर्घटनामा परी ३४ घाइते भएका छन् । घाइतेमध्ये ३ को अवस्था गम्भीर रहेको प्रहरीले जानकारी दिएको छ । घाइतेहरुको डडेल्धुरा अस्पतालमा उपचार भइरहेको छ।
डडेल्धुरा अस्पतालले उनीहरुलाई जिल्ला बाहिर पठाएको छ। रेफर हुनेमा थलरा–३ बझाङका धनबहादुर चौहान, मष्टा–१ का २२ वर्षीय विनोद थापा र गोदावरी नगरपालिका–१० का रमेश चौधरी रहेको अस्पतालले जनाएको छ।
बस सडकबाट ६० मिटर तल खसेको जनाइएको छ। ओभर लोड भएर बस दुर्घटना भएको हुनसक्ने प्रहरीको अनुमान छ।
