काठमाडौं । संघीय संसदको राज्य व्यवस्था तथा सुशासन समितिका सदस्य विजय सुब्बाले स्थानीय तहको कर्मचारी भर्नासम्बन्धि लोक सेवा आयोगलाई दिइएको निर्देशनमा गल्ती गरिएछ भनेर स्वीकार गर्न सभापति शशी श्रेष्ठसँग माग गरेका छन् ।
समितिको शुक्रबारको बैठकमा सत्तारुढ नेकपाका सांसद सुब्बाले ‘लोकसेवा आयोग ऐनमा के छ? समावेशी सिटहरु कहाँ छन् । थाहा पाएपछि बोल्नुपर्ने । अब मागौं । थाहा पाउँ । अनि गल्ती गरिएछ भनेर समीक्षा गरौं’, सांसद सुब्बाले भनेका छन् ।
त्यसअघि कांग्रेस सांसद दिलेन्द्रप्रसाद बडूले समितिको निर्देशन, लोकसेवा आयोगको विज्ञापन र सञ्चारमाध्यममा आएको समाचार मेल नखाएको बताएका थिए । ‘हालसम्म आयोगले कति कर्मचारीलाई बढुवा ग¥यो ? भन्ने जानकारी नभएका कारण पनि लोक सेवा आयोगबारे जनतामा गलत सूचना गएको र त्यसलाई सच्याउन जरुरी रहेको छ,’ उनको भनाई थियो ।
सांसद बडुले लोक सेवा आयोगले खुलाएको विज्ञापन समावेशी भए/नभएको पुनः आयोगसँग बुझ्नुपर्ने पनि बताए । बैठकमा समितिका सभापति शशी श्रेष्ठले पनि सो सम्बन्धमा लोक सेवा आयोगसँग पुनः छलफल गर्ने बताएका थिए ।
