हेटौँडा । बागमती प्रदेशमा मन्त्रिपरिषद बिस्तार भएको छ । प्रदेश सरकारका मुख्यमन्त्री राजेन्द्रप्रसाद पाण्डेले पाँचजना मन्त्री र एक राज्यमन्त्री नियुक्त गरेका हुन् ।
प्रदेश सरकारका मुख्यमन्त्री पाण्डेले नेपालको संविधानको धारा १६८ को उपधारा ९ बमोजिम मन्त्री तथा राज्यमन्त्री थप गरेका हुन् ।
बागमती सरकारमा नेतृत्व गरिरहेको नेकपा (एकीकृत समाजवादी)बाट दुई मन्त्री, एक राज्यमन्त्री र सत्ता साझेदार (माओवादी केन्द्र)बाट तीनजना मन्त्री थप गरिएको छ ।
श्रम, रोजगार तथा यातायातमन्त्रीमा माओवादी केन्द्रका घनश्याम दाहाल, खानेपानी ऊर्जा तथा सिंचाइ मन्त्रीमा एकीकृत समाजवादीका वसन्तप्रसाद मानन्धर, कृषि तथा पशुपंक्षी मन्त्रीमा समाजवादीकै बसुन्धरा हुमागाईं, वन तथा वातावरणमन्त्रीमा माओवादी केन्द्रका विशाल खड्का, युवा तथा खेलकुद मन्त्रीमा माओवादी केन्द्रकै रत्नप्रसाद ढकाल नियुक्त भएका छन् । यस्तै, कृषि तथा पशुपंक्षी राज्यमन्त्रीमा एकीकृत समाजवादीका इन्द्रमाया गुरुङ नियुक्त भएकी छन् ।
योसँगै बागमतीमा मुख्यमन्त्रीसहित ११ मन्त्री र एक राज्यमन्त्रीको सरकार बनेको छ ।
नवनियुक्त मन्त्री तथा राज्यमन्त्रीको सपथ आज साँझ ५ बजे गराउने तयारी भएको छ ।
