काठमाडौँ। समस्याग्रस्त सहकारी व्यवस्थापन समितिले १२ वटा समस्याग्रस्त सहकारीका २३५ जना बचतकर्ताको रकम फिर्ता गरेको छ।
समितिका अनुसार पहिलो चरणमा थोरै बचत रकम भएका बचतकर्तालाई रकम फिर्ता गरिएको हो। समस्याग्रस्त सहकारीबाट ऋण असुली तथा सम्पत्ति व्यवस्थापनबाट प्राप्त रकम बचतकर्तालाई फिर्ता गरिएको समितिले जनाएको छ।
बचत रकमका आधारमा बचतकर्तालाई वर्गीकरण गरी क्रमशः रकम फिर्ता गर्दै जाने समितिले जनाएको छ। प्रचलित कानुनी व्यवस्थाअनुसार समस्याग्रस्त सहकारी संस्थाबाट ऋण असुली र सम्पत्ति व्यवस्थापन गरी प्राप्त रकम सम्बन्धित सहकारीका बचतकर्तालाई फिर्ता गर्ने कार्य निरन्तर भइरहेको समितिको भनाइ छ।
समितिका अनुसार कृषि विकास सहकारीका चार, गोरखा सहकारीका ११, आईडियल यमुनाका छ, कान्तिपुरका ८०, नेपाल वित्तीयका १२, ओरेन्टलका ३७, शिव शिखरका ६२, पशुपतिका चार, तपाईं हाम्रोका १०, स्ट्यान्डर्ड सेभिङका चार, लालीगुराँसका १३ र गौतम श्रीका एक जना बचतकर्ताको रकम फिर्ता गरिएको छ।
यसरी १२ वटा समस्याग्रस्त सहकारीका कुल २३५ जना बचतकर्ताले बचत रकम फिर्ता पाएका छन्।
