काठमाडौँ । संचारकर्मी रवि लामिछानेलाई नेपाली काँग्रेसले अप्रत्यक्ष तरिकाले समर्थन जनाएको छ । काँग्रेस संसदीय दलका प्रमुख सचेतक बालकृष्ण खाँणले प्रकाशित गरेको विज्ञप्तीमा कुनै पनि घटनाको निपष्क्ष एवं स्वतन्त्रतापूर्वक छानविन हुनुपर्ने पार्टीको मान्यता रहेको उल्लेख गरिएको छ ।
संचारकर्मी लामिछानेका समर्थकहरुले उनलाई फसाउन खोजिएको आरोप लगाइएरहेका बेला काँग्रेसले “निर्दोषलाई फसाउने र दोषीलाई उनमुक्ति दिने कार्य नेपाली जनतालाई सह्य हुदैन, नेपाली कांग्रेस न्यायको सिद्धान्त, निष्पक्षता, विधिको शासन र जनभावनाप्रति सदैव समर्पित रही आएको छ,” भन्दै विज्ञप्तीमा लामिछानेको नाम उल्लेख नगरेपनि सन्दर्भ र आसय उनकै विषयमा हो भन्ने बुझिनेगरी लेखिएको छ ।
विज्ञप्तीमा सरकारी स्वामित्वमा रहेका सञ्चार माध्यम रेडियो नेपालको प्रदेश प्रसारण केन्द्र दिपायलमा १० वर्षदेखि कार्यरत सुनिता रावल, ३ वर्षदेखि कार्यरत प्रकाश बम र चक्र कुँवरलाई बर्खास्त गरिएकोप्रति पनि आपत्ति जनाइएको छ ।
रेडियो प्रसार समितिको साउन ३१ गतेको निर्णय अनुसार भन्दै उनीहरुलाई निस्कासन गरी उनीहरुको ठाउँमा नवराज जोशी, लोकेश अधिकारी र दीर्घ खत्रीलाई दैनिक ज्यालादारीमा नियुक्त गरिएपछि त्यसको सर्वत्र विरोध भएको छ ।
पत्रकार महासंघ, प्रेस युनियनलगायतका संघसंस्थाहरुले पुनर्वहालीको माग गर्दै आन्दोलन नै सुरु गरेका छन् भने संसदमा पनि सांसदहरुले सरकारको ध्यानाकर्षण गराएका छन् ।
