पाल्पा। चार दिनदेखि लगातार परेको वर्षासँगै आएको बाढी र पहिरोले पाल्पाका सडक तथा पुलमा व्यापक क्षति पुगेको छ ।
मुख्य राजमार्गदेखि ग्रामीण सडकसम्म दर्जनौँ स्थानमा पहिरो खस्दा यातायात प्रभावित भएका छन् भने कालीगण्डकी नदीमा आएको बाढीले पक्की तथा झोलुङ्गे पुलसमेत क्षतिग्रस्त बनाएको छ ।
वर्षाका कारण कतिपय सडकको तल्लो भाग कटान भएर सडक भासिएको छ भने ठाउँठाउँमा पहिरो खस्दा सडक अवरुद्ध भएका छन् ।
सडक अवरुद्ध हुँदा यात्रु तथा सवारीसाधन अलपत्र पर्नुका साथै ग्रामीण क्षेत्रका बासिन्दाले दैनिक उपभोग्य वस्तु, कृषि उपज तथा बिरामीलाई उपचारका लागि अस्पतालसम्म लैजानसमेत समस्या भोग्नुपरेको स्थानीय बताउँछन् ।
सिद्धार्थ राजमार्गमा ठूला सवारी रोकिए
सिद्धार्थ राजमार्गअन्तर्गत बर्तुङ्ग-राम्दी खण्डको माथागढी गाउँपालिका-१, चिदिपानी, धेरैनीमा पहिरो खसेपछि सडक अवरुद्ध भएको छ । वर्षाका कारण सडकको तल्लो भाग कटान हुनुका साथै राजमार्गको करिब आधा भाग भासिएपछि आज बिहानैदेखि यातायात प्रभावित भएका स्थानीय शिशिर भट्टराईले जानकारी दिनुभयो । उहाँका अनुसार राजमार्ग अवरुद्ध भएपछि स्याङ्जा र पोखराबाट बुटवलतर्फ तथा बुटवलबाट पोखरातर्फ जाने ठूला सवारीसाधन सडकमा अलपत्र परेका छन् ।
मोटरसाइकल तथा साना सवारीसाधनलाई भने सावधानीपूर्वक गन्तव्यतर्फ पठाइएको छ । सडकको तल्लो भागबाट जग निकाल्न नमिल्ने भएकाले माथिल्लो भाग कटान नगरी ठूला सवारीसाधन सञ्चालन गर्न सकिने अवस्था नरहेको सडक डिभिजन पाल्पाका निमित्त प्रमुख पवित्रमणि आचार्यले बताउनुभयो ।
ग्रामीण सडक अवरुद्ध
रूपन्देहीको सालझण्डीबाट रैनादेवी छहराको सुन्दरेढुङ्गा जोड्ने सडकखण्डमा दर्जनौँ स्थानमा पहिरो खसेपछि यातायात अवरुद्ध भएको छ । रिब्दीकोट गाउँपालिकाको मुख्य सडकबाट मुझुङ-मैनादी जोड्ने मोटरबाटो पहिरोका कारण पूर्ण रूपमा बन्द रहेको स्थानीय कृष्ण पोखरेलले बताउनुभयो । पूर्वखोला जोड्ने विभिन्न ग्रामीण सडक तथा माथागढी गाउँपालिकाको केन्द्रबाट रूपन्देहीको खैरेनी जोड्ने मोटरबाटो पहिरोका कारण प्रभावित भएका छन् ।
निस्दी गाउँपालिकाको केन्द्रसम्म जोड्ने करिब सात किलोमिटर सडकका १० ठाउँमा पहिरो खसेको छ । ढुङ्गानाबेँसी-मित्याल सडकखण्डमा पनि दर्जनौँ स्थानमा पहिरो खसेपछि यातायात अवरुद्ध भएको सडक डिभिजनका निमित्त प्रमुख आचार्यले जानकारी दिनुभयो ।
तिनाउ गाउँपालिका-तल्लो कचलमा पहिरोका कारण चार दिनदेखि बजारसँगको सडक सम्पर्क विच्छेद भएको स्थानीय विपीन आचार्यले बताउनुभयो । सडक अवरुद्ध भएपछि स्थानीय तहले डोजर तथा अन्य साधन परिचालन गरी सडक खुलाउने प्रयास गरिरहेका छन् ।
लगातारको वर्षासँगै कालीगण्डकी नदीमा आएको बाढीले पक्की तथा झोलुङ्गे पुलमा समेत क्षति पुर्याएको छ । सडक डिभिजन पाल्पाका अनुसार रामपुर नगरपालिका-३, केलादीस्थित मोटरेबल पुल प्रभावित भएको छ ।
कालीगण्डकीको बाढी पुलभन्दा माथिबाट बगेपछि पुलका पाल्पातर्फका दुई स्पानमा क्षति पुगेको निमित्त प्रमुख आचार्यले बताउनुभयो । उहाँका अनुसार रामपुरदेखि मित्याल हुँदै पूर्वी नवलपरासीको अरुणखोला जोड्ने सडकखण्डमा पर्ने अर्को नदीमाथिको पुलमा समेत क्षति पुगेको छ । पुलमा क्षति भएपछि उक्त क्षेत्रमा आवागमन बन्द गरिएको छ ।
सडक र पुल अवरुद्ध हुँदा यातायातमा मात्रै नभई स्थानीयको जनजीवन र अर्थतन्त्रमा समेत प्रत्यक्ष असर परेको छ । बिरामीलाई समयमै अस्पताल पुर्याउन कठिनाइ हुनुका साथै किसानले उत्पादन गरेका दूध, तरकारी, खुर्सानीलगायत कृषि उपज बजारसम्म लैजान नसक्दा ठूलो आर्थिक क्षति बेहोर्नुपरेको स्थानीय बताउँछन् ।
रिब्दीकोट र तिनाउ क्षेत्रका किसानका लागि अहिले खुर्सानी उत्पादन गरी बजारमा पठाउने मुख्य समय हो । तर सडक अवरुद्ध भएपछि खेतमा पाकेको खुर्सानी बजारसम्म लैजान नसकिएको किसान तथा व्यवसायीले बताएका छन् । स्थानीय कृषक विष्णुप्रसाद पोखरेलका खेतमा पाकेर राताम्य भएको खुर्सानी टिपेर बजार पुर्याउन नसक्दा खेतमै कुहिन थालेका छन् । सडक लामो समयसम्म नखुले उत्पादनमा थप क्षति हुने भन्दै उहाँले चिन्ता व्यक्त गर्नुभयो ।
बाढीपहिरोबाट भएको क्षतिको विवरण संकलनसँगै सडक सञ्चालनका लागि स्थानीय तह तथा सम्बन्धित निकायले पहल थालेका छन् । पहिरो पन्छाउने, सडकमा थुप्रिएको माटो तथा ढुङ्गा हटाउने र क्षतिग्रस्त संरचनाको तत्कालीन मर्मत गर्ने काम भइरहेको सम्बन्धित स्थानीय तहले जनाएका छन् ।
खानेपानीसमेत अवरुद्ध
वर्षाका कारण तानसेनको खानेपानी सेवासमेत प्रभावित भएको छ । लगातारको वर्षाका कारण खानेपानीका मुहान तथा पम्पिङ स्टेसन आसपास पहिरो गएपछि खानेपानी सेवा प्रभावित बन्न पुगेको हो । क्षति पुगेका ठाउँमा मर्मतको काम भइरहेकाले खानेपानी आपूर्तिमा केही समय ढिलाइ हुन सक्ने तानसेन खानेपानी उपभोक्ता समितिका अध्यक्ष मोहनप्रसाद श्रेष्ठले बताउनुभयो ।
लगातारको वर्षाका कारण खानेपानीका मुहान तथा पम्पिङ स्टेसन आसपास पहिरो गएको छ । केही पम्पिङ स्टेसनमा क्षति पुगेको, वयल तथा ट्रान्सफर्मर पुरिएको अवस्थामा रहेकाले तत्काल पानी सङ्कलन तथा पम्पिङ गर्न कठिनाइ भएको उहाँको भनाइ छ ।
अध्यक्ष श्रेष्ठले सेवा सञ्चालन नहुँदासम्म उपलब्ध पानीको उचित व्यवस्थापन तथा सदुपयोग गर्न सबै उपभोक्तालाई आग्रहसमेत गर्नुभएको छ । रासस
