लिभरपुल। बेलायतका प्रधानमन्त्री एन्डी बर्नहमले मङ्गलबार आफ्नो लेबर पार्टीको वार्षिक भेलामा नेताको रूपमा पहिलो भाषण दिँदै ‘बेलायतलाई पहिलेको अवस्थामा फकाउने’ योजना प्रस्तुत गर्नुहुने स्थानीय सञ्चारमाध्यमहले जनाएका छन् ।
उहाँले राजनीतिज्ञहरूले ‘सामान्यतया टार्ने’ मुद्दाहरू समाधान गर्ने योजना सार्वजनिक गर्न लागेका उहाँ निकट नेताहरूले दावी गरेका छन् ।
प्रधानमन्त्रीका रूपमा केयर स्टार्मरको दुई वर्षे कार्यकाल अन्त्य गरी सत्तामा पुगेका ५६ वर्षीय म्यानचेस्टरका पूर्व नगर प्रमुख बर्नहमले बेलायती राजनीतिमा नयाँ तरङ्ग ल्याउनुभएको छ । उहाँ जुलाईमा डाउनिङ स्ट्रिट (बेलायती प्रधानमन्त्री)मा निर्वाचित हुन्ुभएको थियो ।
सरकारको आर्थिक अवस्था निकै कडा भएको बेला देशको पुनःऔद्योगिकीकरण र निःशुल्क सामाजिक हेरचाहजस्ता महत्त्वाकांक्षी र खर्चिलो वाचा कसरी पूरा गर्ने भन्ने स्पष्ट पार्न उहाँमा दबाब छ ।
एक दशकभित्र बेलायतको सातौँ प्रधानमन्त्री बनेका बर्नहमले लिभरपुलमा आफ्नो मुख्य सम्बबोधनमार्फत ‘एक पुस्तामा जनतालाई दिइएको भन्दा बढी गम्भीर योजना’ प्रस्तुत गर्नुहुने लेबर पार्टीले प्रेस विज्ञप्तिमा जनाएको छ ।
“म स्वीकार्छु,सबैजना यसका हरेक भागसँग सहमत हुनेछैनन्, तर म विश्वास गर्छु, यसले बेलायतलाई पूर्व अवस्थामा फर्काउन सक्छ,” सम्बोधन पूर्व जारी गरिएका भनाइमा प्रधानमन्त्रीले बताउनुभएको छ ।
लेबरको विज्ञप्तिअनुसार बर्नहमले दिउँसो २ बजे लेबर सांसद र कार्यकर्ताहरूलाई सम्बोधन गर्दा ‘देशका लागि स्पष्ट दिशा’ प्रस्तुत गर्नुहुनेछ ।
उहाँले ‘धेरै समयदेखि बेवास्ता गरिएका कठिन मुद्दाहरू’ माथि ध्यान दिनुहुने विज्ञप्तिमा उल्लेख गरिएको छ । त्यसमा सामाजिक हेरचाह, युवा बेरोजगारीको उच्च स्तर र ‘ऊर्जा, पानी र आवासमा बढी सार्वजनिक नियन्त्रणको आवश्यकता’ समावेश छ ।
उहाँले बेलायतको विद्युत् ग्रिडमा लगानी गर्न नयाँ सरकारी निकाय पनि घोषणा गर्ने र यसले उच्च ऊर्जा मूल्य घटाउने प्रयास हुने बताइएको छ ।
जुलाई २० मा प्रधानमन्त्री बनेपछि (नौ वर्षपछि संसदमा फर्केको केही हप्तामै) बर्नहमले बढी आशावादी स्वर अपनाउने प्रयास गर्नुभएको छ।
मध्यपूर्व र युक्रेनका युद्धले बढाएको जीवनयापनको दबाबबाट जनतालाई केही ‘राहत महशुस गर्ने ठाउँ’ दिन उहाँले प्रयास गरिरहनुभएको छ र उहाँको मैत्रीपूर्ण व्यवहारले सार्वजनिक छवि बलियो बनाएको छ ।
मङ्गलबारको नयाँ युगोभ सर्वेक्षणले लेबरलाई प्रतिस्पर्धी रिफर्म युकेभन्दा पछाडि देखाएको थियो । सर्वेक्षणमा लेबरको मत प्रतिशत २४ छ भने कट्टर दक्षिणपन्थी, आप्रवासन विरोधी दलको २५ प्रतिशत छ ।
