काठमाडौँ। दुई दिनदेखिको अविरल वर्षाका कारण जनजीवन कष्टकर बनेको काठमाडौं उपत्यकाको मौसममा शनिवार बिहानदेखि सुधार आएको छ ।
वर्षा रोकिएर आकाश खुल्न थालेपछि ठप्पप्रायः रहेको उपत्यकाको चहलपहल पुनः सामान्य अवस्थामा फर्किन थालेको हो । बिहीवार र शुक्रवार मुलुकभरजसो परेको भारी वर्षाले काठमाडौं उपत्यकासहित आसपासका क्षेत्रमा जनजीवन नराम्ररी प्रभावित पारेको थियो ।
निरन्तरको वर्षाका कारण सडक आवतजावत, दैनिक कामकाज र व्यापार–व्यवसायमा समेत सुस्तता देखिएको थियो । शनिवार बिहानैदेखि वर्षाको क्रम रोकिएर घाम लाग्न थालेपछि जनजीवनमा केही सहजता महशुस गरिएको छ ।
यद्यपि, मौसम अझै पूर्णरूपमा स्थिर भइसकेको छैन । जल तथा मौसम विज्ञान विभागले मौसममा सुधार देखिए पनि पूर्ण रूपमा ढुक्क हुने अवस्था नरहेको जनाएको छ । विभागकाअनुसार केही स्थानमा अझै पनि छिटपुट वर्षा हुने सम्भावना कायमै रहेको छ ।
विभागले पछिल्लो दुई दिनको वर्षाका कारण जमिन गलिसकेको र नदीनालाको बहावमा केही परिवर्तन हुनसक्ने भन्दै विशेष शतर्कता अपनाउन स्थानीयवासीलाई आग्रह गरेको छ ।
विशेषगरी नदी तटीय क्षेत्रका बासिन्दा र पहिरोको उच्च जोखिम भएका स्थानमा बसोवास गर्नेहरूलाई सावधानी अपनाउन भनिएको छ ।
आगामी केही दिनसम्म मौसम पूर्वानुमान महाशाखाको सूचनालाई आधार मानेर दैनिक गतिविधि गर्न विभागले अनुरोध गरेको छ । पूर्वबाट क्रमशः वर्षा गराउने मौसम पश्चिमतिर सरेकाले पश्चिम क्षेत्रमा शतर्कता अपनाउन आग्रह गरेको छ । –न्युज एजेन्सी नेपाल
