काठमाडौँ। अन्तर्राष्ट्रिय हवाई उडान सञ्जाल (कनेक्टिभिटी) मा एशिया–प्रशान्त क्षेत्रका विमानस्थलहरूले विश्वमै अग्रणी स्थान ओगटेका छन् ।
विश्वव्यापी यात्रा सम्बन्धी तथ्याङ्क तथा विश्लेषण उपलब्ध गराउने अन्तर्राष्ट्रिय संस्था ‘ओएजी’ ले सार्वजनिक गरेको पछिल्लो प्रतिवेदनअनुसार विश्वका शिर्ष २० कनेक्टिभिटी भएका विमानस्थलमध्ये आठवटा एशिया–प्रशान्त क्षेत्रकै परेका छन् ।
ओएजीद्वारा जारी ‘मेगाहब्स’ प्रतिवेदनअनुसार मलेसियाको क्वालालम्पुर अन्तर्राष्ट्रिय विमानस्थल विश्वभरमै चौथो तथा समग्र एशियाली क्षेत्रमा पहिलो स्थानमा रहन सफल भएको छ । उक्त विमानस्थलबाट हाल विश्वका १५४ वटा अन्तर्राष्ट्रिय गन्तव्यहरूमा प्रत्यक्ष हवाई सम्पर्क कायम रहेको प्रतिवेदनले देखाएको छ ।
यसले दक्षिणपूर्वी एशियाली उड्डयन बजारलाई विश्व सञ्जालसँग जोड्न क्वालालम्पुरले खेलेको रणनीतिक भुमिकालाई पुष्टि गर्दछ । प्रतिवेदनमा औंल्याइएअनुसार एशिया–प्रशान्त क्षेत्रका शिर्ष १० विमानस्थलहरूमा कुनै एउटा मात्र प्रमुख वायुसेवा कम्पनीको एकाधिकार न्युन रहेको छ ।
यहाँका शिर्ष विमानस्थलहरूमा प्रमुख विमान कम्पनी (डोमिनेन्ट क्यारियर) को औसत हिस्सा ३३ प्रतिशत मात्र रहेको पाइएको छ, जुन विश्वका अन्य विकसित क्षेत्रहरूको तुलनामा निकै कम हो । यसले उड्डयन बजारमा एकल वर्चश्वको सट्टा तिब्र र स्वस्थ प्रतिष्पर्धा रहेको स्पष्ट पार्छ ।
ओएजीका विश्लेषकहरूकाअनुसार दक्षिणपूर्वी तथा उत्तरपूर्वी एशियाली मुलुकहरूमा पूर्ण–सेवा प्रदायक (फुल–सर्भिस) तथा बजेट एयरलाइन्स (लो–कस्ट क्यारियर) दुवैको सन्तुलित र प्रभावकारी उपस्थिति रहेको छ ।
विभिन्न वर्ग र आवश्यकताका यात्रुहरूलाई लक्षित गरी सञ्चालन गरिएका यी विविध वायुसेवा कम्पनीहरूको उपस्थितिले गर्दा नै यस क्षेत्रमा हवाई सम्पर्क सञ्जाल सर्वाधिक फराकिलो र सुदृढ बन्न पुगेको निष्कर्ष प्रतिवेदनको छ । सिन्ह्वा/न्युज एजेन्सी नेपाल
