काठमाडौं । पूर्वप्रधानमन्त्री एवं नेपाली कम्युनिष्ट पार्टी (नेकपा) का सहसंयोजक माधवकुमार नेपालले विदेशी चलखेलका कारण मुलुक ठूलो संकटबाट गुज्रिरहेको बताउनुभएको छ ।
शुक्रवार काठमाडौंमा अखिल नेपाल किसान महासंघको केन्द्रीय समितिको पूर्ण बैठकलाई सम्बोधन गर्दै नेपालले राष्ट्रियता संकटमा परेको दाबी गर्दै नेपाल कतै विदेशीहरूको खेलमैदान बन्ने त होइन भन्ने चिन्ता व्यक्त गर्नुभयो ।
नेपालजस्तो भूपरिवेष्टित मुलुकले दुई ठूला छिमेकीसँग सुमधुर सम्बन्ध कायम गर्दै राष्ट्रिय स्वाभिमान र सम्मानको रक्षा गर्नुपर्नेमा उहाँले जोड दिनुभयो । राष्ट्रिय स्वाभिमान र सम्मानमा चुनौती खडा गर्ने प्रयास भए त्यसको सामना गर्ने आँट आवश्यक रहेको उहाँको भनाइ थियो ।
नेपालले राष्ट्रियता, लोकतन्त्र, गणतन्त्र, संविधान र संघीयताको विषयमा गम्भीर भएर अघि बढ्नुपर्ने बताउनुभयो । गणतन्त्र स्थापना, संविधान निर्माण र संघीयता कार्यान्वयनमा आफूहरूको महत्वपूर्ण भूमिका रहेको उल्लेख गर्दै उहाँले संघीयताको संरक्षण र सुदृढीकरणको जिम्मेवारी पनि आफूहरूमाथि रहेको दाबी गर्नुभयो ।
उहाँले लोकतन्त्र, गणतन्त्र, संविधान र संघीयताको संरक्षणका लागि विचार मिल्ने तथा लोकतन्त्रका लागि संघर्ष गरेका राजनीतिक दलहरू एक भएर अघि बढ्नुपर्ने बताउनुभयो । राष्ट्रिय राजनीतिमा नेकपाको महत्वपूर्ण भूमिका रहेको उल्लेख गर्दै उहाँले गणतन्त्र, संविधान र संघीयताको संरक्षण तथा सुदृढीकरणका लागि सबै पक्षको सहयोग आवश्यक रहेको बताउनुभयो ।
नेपालले कृषिको आधुनिकीकरण र यान्त्रिकीकरणमार्फत कृषि क्रान्तिलाई अघि बढाउनुपर्नेमा पनि जोड दिनुभयो ।
