काठमाडौं । नेकपा (एमाले)का सांसद लक्ष्मीप्रसाद पोखरेलले प्रधानमन्त्री बालेन्द्र साह र राष्ट्रिय स्वतन्त्र पार्टी (रास्वपा)का सभापति रवि लामिछानेसहित केही प्रमुख नेताहरूको राजनीतिक उदयमा अमेरिकी सहयोगमा सञ्चालित संस्थाहरूको भूमिका रहेको भनी प्रकाशित समाचारबारे सरकारसँग जवाफ माग गर्नुभएको छ ।
प्रतिनिधि सभाको बिहीवारको बैठकमा बोल्दै सांसद पोखरेलले केही दिनअघि अमेरिकी अनलाइन सञ्चारमाध्यम ‘द ग्रेजोन’ले रास्वपाको उदयमा अमेरिकी लगानी रहेको दाबी गर्दै प्रकाशित गरेको रिपोर्टबारे सरकार र नाम जोडिएका व्यक्तिहरूले स्पष्ट पार्नुपर्ने बताउनुभयो ।
उहाँले गत वर्ष भदौ २३ र २४ गते भएका घटनाका विषयमा अन्तर्राष्ट्रिय सञ्चारमाध्यममा आएका समाचारहरू गम्भीर प्रकृतिका रहेको दाबी गर्नुभयो । सिंहदरबारसहित सरकारी, निजी, व्यावसायिक तथा राजनीतिक दलका कार्यालयमा भएको आगजनीमा तालिमप्राप्त समूहको संलग्नता र रासायनिक पदार्थ ‘सोडियम’ प्रयोग भएको विषयमा यसअघि नै ‘न्युयोर्क टाइम्स’ले समाचार प्रकाशित गरेको उहाँले उल्लेख गर्नुभयो ।
सांसद पोखरेलले ‘द ग्रेजोन’ले प्रधानमन्त्री बालेन्द्र साहसहित रास्वपाका केही प्रमुख नेताहरूको राजनीतिक उदयमा अमेरिकी सहयोगमा सञ्चालित संस्थाहरूको भूमिका रहेको दाबी गरेको भन्दै त्यसको जवाफ माग गर्नुभयो ।
उहाँले भन्नुभयो, “द ग्रेजोनले प्रकाशित गरेका तथ्यहरू उपर कसले जवाफ दिने हो ? प्रधानमन्त्री बालेन्द्र शाहसहित राष्ट्रिय स्वतन्त्र पार्टीका केही प्रमुख नेताहरूको राजनीतिक उदयमा अमेरिकी सहयोगमा सञ्चालित संस्थाहरूको भूमिका रहेको दाबी द ग्रेजोनले गरेको छ । सभामुख महोदय, यसको जवाफ चाहिन्छ । प्रश्नबाट कोही पनि भाग्न पाउँदैन । सरकार र नाम जोडिएकाहरूले जवाफ दिनुपर्छ ।”
सांसद पोखरेलले उक्त विषयमा सरकार तथा समाचारमा नाम जोडिएका व्यक्तिहरूले सार्वजनिक रूपमा जवाफ दिनुपर्ने माग दोहोर्याउनुभयो ।
