काठमाडौं । नेपाली कांग्रेसको १५औँ महाधिवेशनअन्तर्गत असोज ३ गते हुने वडा अधिवेशन निर्धारित कार्यतालिकाअनुसार नै हुने भएको छ ।
बुधबार पार्टी केन्द्रीय कार्यालय सानेपामा आयोजित पत्रकार सम्मेलनमा केन्द्रीय निर्वाचन समितिका संयोजक प्रेमबहादुर खड्काले सामाजिक सञ्जालमा अधिवेशन सर्ने भन्दै भइरहेको प्रचारमा कुनै सत्यता नभएको स्पष्ट पार्नुभयो । उहाँले संवैधानिक व्यवस्था, सर्वोच्च अदालतको फैसला र निर्वाचन कार्यतालिकाअनुसार वडा अधिवेशन तोकिएकै मितिमा हुने बताउनुभयो ।
संयोजक खड्काका अनुसार ७७ वटै जिल्लामा निर्वाचन अधिकृत खटाइसकिएको छ । निर्वाचन अधिकृतहरू सम्बन्धित जिल्लामा पुगेर जिल्ला सभापति तथा स्थानीय पार्टी नेतृत्वसँग समन्वय गरिरहेका छन् । प्रत्येक वडामा मतदान अधिकृतसमेत परिचालन गर्ने तयारी गरिएको उहाँले जानकारी दिनुभयो ।
उहाँले कांग्रेसको महाधिवेशनलाई पार्टीको आन्तरिक निर्वाचनका रूपमा मात्रै नभई संवैधानिक सर्वोच्चता र विधिको शासनसँग जोडेर हेर्नुपर्ने बताउनुभयो । सर्वोच्च अदालतको फैसलाविपरीत कांग्रेस अघि नबढ्ने भन्दै उहाँले निर्धारित कार्यतालिकाअनुसार असोज ३ गते वडा अधिवेशन सम्पन्न हुने स्पष्ट पार्नुभयो ।
बाढी तथा विपद्बाट प्रभावित केही जिल्लामा अधिवेशन सञ्चालनमा समस्या देखिए पनि स्थलगत जानकारी र निर्वाचन अधिकृतहरूको रिपोर्टका आधारमा अधिकांश क्षेत्रमा निर्वाचन सञ्चालन गर्न सकिने अवस्था रहेको उहाँले बताउनुभयो । विशेषगरी धादिङ र नुवाकोटका केही क्षेत्रमा समस्या रहेको भन्दै ती क्षेत्रको अवस्थाबारे स्थलगत अध्ययन र सम्बन्धित प्रतिनिधिसँग छलफल भइरहेको उहाँको भनाइ छ ।
धादिङको एक क्षेत्रमा एउटै परिवारका ठूलो संख्यामा सदस्यको मृत्यु भएको जानकारी प्राप्त भए पनि अन्य क्षेत्रमा अधिवेशन सञ्चालन गर्न सकिने रिपोर्ट आएको संयोजक खड्काले बताउनुभयो ।
उहाँका अनुसार जिल्ला र प्रदेश अधिवेशन भने केन्द्रीय महाधिवेशनपछि गर्ने गरी यसअघि नै कार्यतालिका तय भइसकेको छ । वडा, क्षेत्र र प्रदेश तहबाट महाधिवेशनका लागि आवश्यक मतदाता तयार भएपछि केन्द्रीय महाधिवेशनको प्रक्रिया अघि बढाइनेछ ।
यसैबीच, कांग्रेस केन्द्रीय निर्वाचन समितिले वडा तहको निर्वाचनका लागि करिब ९ हजार निर्वाचन अधिकृत फिल्डमा परिचालन भइसकेको जनाएको छ । समितिका सदस्यसचिव राजु कटुवालका अनुसार असोज ३ र ४ गते हुने वडा अधिवेशनका लागि आवश्यक तयारी पूरा भएको छ ।
उनका अनुसार ७७ जिल्लामा ७७ जना, १६५ प्रतिनिधिसभा निर्वाचन क्षेत्रमा १६५ जना, ३३० प्रदेशसभा निर्वाचन क्षेत्रमा ३३० जना, ७५३ स्थानीय तहमा ७५३ जना र ६ हजार ७४३ वडामा ६ हजार ७४३ जना निर्वाचन अधिकृत खटाइएको छ । उनीहरूलाई सहयोग गर्न सोही अनुपातमा मतदान अधिकृतसमेत परिचालन हुनेछन् ।
१५औँ महाधिवेशनबाट वडा कार्यसमिति र क्षेत्रीय प्रतिनिधिसहित करिब साढे तीन लाख प्रतिनिधि चयन हुने प्रारम्भिक अनुमान निर्वाचन समितिको छ । वडा तहबाट मात्रै करिब २ लाख ९६ हजार ६९२ जना प्रतिनिधि तथा पदाधिकारी चयन हुने समितिले जनाएको छ ।
यस्तै, महाधिवेशन प्रतिनिधिको संख्या करिब ७ हजार पुग्ने प्रारम्भिक अनुमान गरिएको छ । १५० क्रियाशील सदस्यको सिलिङका आधारमा १६५ प्रतिनिधिसभा निर्वाचन क्षेत्रबाट ५ हजार ४४५ जना, प्रदेशसभा क्षेत्रका पदेन प्रतिनिधि ३३० जना र पालिका सभापतिबाट ७५३ जना महाधिवेशन प्रतिनिधि आउने प्रारम्भिक हिसाब रहेको कटुवालले जानकारी दिनुभयो । विदेशस्थित जनसम्पर्क समिति, भ्रातृ तथा शुभेच्छुक संस्थाबाट आउने प्रतिनिधि थपिएपछि संख्या अझ बढ्न सक्ने उहाँले बताउनुभयो ।
निर्वाचन समितिले करिब ८ लाख ७० हजार क्रियाशील सदस्यको डिजिटल विवरण प्राप्त गरिसकेको जनाएको छ । रसुवा, नुवाकोट र धादिङलगायत केही जिल्लाको विवरण अन्तिम रूप दिन बाँकी रहेकाले ती जिल्लाको विवरण पछि थपिने कटुवालले बताउनुभयो ।
समितिले क्रियाशील सदस्यको नामावली पीडीएफ फाइलमा तयार गरी सम्बन्धित जिल्लामा पठाउने तयारी गरेको छ । तीन जिल्लाबाहेक ७४ जिल्लामा नामावली पठाउने काम अघि बढिसकेको उहाँले जानकारी दिनुभयो ।
यसपटकको महाधिवेशनलाई केही हदसम्म डिजिटल बनाउने योजना रहेको पनि निर्वाचन समितिले जनाएको छ । निर्वाचन निर्देशिकाको ‘अनुसूची २५’ मा वडा कार्यसमिति, क्षेत्रीय प्रतिनिधि तथा महाधिवेशन प्रतिनिधिको संख्या र विभिन्न समुदायको प्रतिनिधित्वसम्बन्धी व्यवस्था तालिकामार्फत स्पष्ट पारिएको कटुवालले बताउनुभयो ।
महाधिवेशनलाई महिलामैत्री बनाउने उद्देश्यले निर्वाचन अधिकृतको भूमिकामा महिला कानुन व्यवसायीको सहभागिता पनि बढाइएको छ । काठमाडौं, भक्तपुर र ललितपुरका १५ प्रतिनिधिसभा निर्वाचन क्षेत्रमा १८ जना महिला कानुन व्यवसायी निर्वाचन अधिकृतका रूपमा खटिएका छन् । अर्घाखाँचीमा अञ्जु रेग्मी निर्वाचन अधिकृतका रूपमा खटिनुभएको छ ।
यससँगै १९ जना महिला कानुन व्यवसायी प्रत्यक्ष रूपमा निर्वाचन अधिकृतको भूमिकामा सक्रिय रहेको कटुवालले जानकारी दिनुभयो । उहाँले असोज ३ र ४ गते हुने वडा तहको निर्वाचन निर्धारित समयमै हुने भन्दै अधिवेशन सर्ने विषयमा कुनै दुविधा नरहेको स्पष्ट पार्नुभयो ।
