काठमाडौँ । नेपाली कांग्रेसका पूर्वसभापति शेरबहादुर देउवा पक्षले पार्टीको १५औँ महाधिवेशनको तालिका स्थगित नगरी संस्थापन पक्षले गरेको पछिल्लो निर्णयप्रति सहमत हुन नसकिने जनाएको छ ।
देउवा समूहका शीर्ष नेताहरूबीच आज बिहान भएको छलफलपछि नेता एनपी साउदले संस्थापन पक्षको निर्णयमा आफूहरू सहमत हुन नसक्ने बताउनुभएको हो ।
संस्थापन पक्षले आइतबार बसेको केन्द्रीय कार्यसम्पादन समितिको बैठकबाट १४औँ महाधिवेशनबाट निर्वाचित केन्द्रीय कार्यसमितिका सबै सदस्यलाई वर्तमान केन्द्रीय कार्यसमितिको सदस्यका रूपमा महाधिवेशनमा सहभागी गराउन विधानबमोजिम आवश्यक प्रबन्ध गर्ने निर्णय गरेको थियो ।
महामन्त्री प्रदीप पौडेलले भने महाधिवेशनमा कोही पनि नछुटून् भन्ने उद्देश्यले असहमति र चासोलाई संवाद तथा सहमतिबाट सम्बोधन गर्न निरन्तर पहलकदमी लिने उद्देश्यले उक्त निर्णय गरिएको बताउनुभएको छ ।
यसअघि देउवा पक्षले गत साउन २९ गतेदेखि तीन दिने राष्ट्रिय सम्मेलन आयोजना गरेको थियो । सम्मेलनपछि संस्थापनइतर पक्षले कांग्रेसको छुट्टै १५औँ महाधिवेशन आगामी मङ्सिर २१ देखि २३ गतेसम्म काठमाडौँमा गर्ने निर्णय गरेको थियो ।
यता संस्थापन पक्षले यसअघि नै पार्टीको १५औँ महाधिवेशन आगामी असोज १६ देखि १९ गतेसम्म काठमाडौँमा गर्ने निर्णय गरिसकेको छ । दुवै पक्षले छुट्टाछुट्टै मितिमा महाधिवेशन गर्ने निर्णय गरे पनि पार्टीभित्र सहमति र एकताको प्रयास भने जारी रहेको देखिएको छ।
