काठमाडौं । कृष्णभीर पहिरोका कारण अवरुद्ध सडकखण्ड सञ्चालनमा ल्याउने कार्यअन्तर्गत परीक्षणका रूपमा सवारीसाधन आवागमन गराइएको छ।
काठमाडौँ–चितवनतर्फ एउटा बुलेट सवारीसहित करिब २० वटा सवारीसाधनलाई पहिरो प्रभावित सडकखण्डबाट सफलतापूर्वक पार गराइएको हो। त्यसैगरी, चितवन–काठमाडौँतर्फबाट एउटा भारी सवारीसाधनसमेत सफलतापूर्वक पास गराइएको जनाइएको छ।
परीक्षणका क्रममा दुवैतर्फ सवारीसाधन सञ्चालन गर्न सकिने अवस्था देखिएसँगै सडकलाई पूर्णरूपमा सञ्चालनमा ल्याउने कार्यलाई तीव्रता दिइएको छ। सम्बन्धित निकायले सडक पूर्ण सञ्चालनमा ल्याउन आवश्यक कामलाई तीव्र गतिमा अघि बढाइरहेको जनाएको छ।
