काठमाडौं । राष्ट्रिय प्रजातन्त्र पार्टी (राप्रपा) महाधिवेशनको दिशामा अघि बढेको छ। पार्टीले भदौ मसान्तसम्म सबै जिल्लाको अधिवेशन सम्पन्न गर्ने तालिका बनाएसँगै जिल्ला अधिवेशनहरू धमाधम भइरहेका छन्।
राप्रपाका प्रवक्ता मोहनकुमार श्रेष्ठका अनुसार हालसम्म ४४ जिल्लामा जिल्ला अधिवेशन सम्पन्न भइसकेको छ। अधिवेशन हुन बाँकी जिल्लाहरूले पनि निर्धारित तालिकाभित्रै अधिवेशन सम्पन्न गर्ने गरी मिति घोषणा गरेर तयारी तीव्र पारेका छन्।
आज बिहीबार बारा, दोलखा, कालिकोट र भोजपुरमा जिल्ला अधिवेशन हुँदैछ। बाँकी जिल्लामा पनि तोकिएको समयसीमाभित्र अधिवेशन सम्पन्न गर्ने गरी पार्टी संगठन परिचालन र तयारीलाई अघि बढाइएको प्रवक्ता श्रेष्ठले जानकारी दिएका छन्।
जिल्ला अधिवेशन सम्पन्न भएसँगै राप्रपाले आगामी महाधिवेशनका लागि संगठनात्मक आधार तयार गर्ने प्रक्रियालाई गति दिएको छ।
