रसुवा। रसुवा लगायतका विभिन्न जिल्लामा आएको त्रिशूली बाढीका कारण हालसम्म १ हजार ३ सय ५६ जनाको मृत्यु भएको छ ।
राष्ट्रिय विपद् जोखिम न्युनिकरण तथा व्यवस्थापन प्राधिकरणले शनिबार साँझ ६ बजे सार्वजनिक गरेको पछिल्लो तथ्याङ्कअनुसार बाढी र पहिरोमा परी ठुलो संख्यामा मानवीय क्षति हुनुका साथै करिव ५ हजार व्यक्ति अझै सम्पर्कविहीन छन् ।
प्राधिकरणकाअनुसार बाढीबाट सबैभन्दा बढी चितवनमा ३६३ जनाको मृत्यु भएको छ । त्यस्तै, नवलपरासी पूर्वमा २२३, नवलपरासी पश्चिममा २२१, नुवाकोटमा १९७, रसुवामा १६९, गोरखामा ७५, धादिङमा ७० र तनहुँमा ३८ जनाको शव फेला परेको छ । फेला परेका शवहरूमध्ये हालसम्म ९८ जनाको मात्र पहिचान खुलेको छ ।
पहिचान हुन बाँकी शवहरूको डिएनए परीक्षणका लागि सम्बन्धित जिल्ला प्रहरी कार्यालयमा फोटो र नाता प्रमाणितसहित सम्पर्क गर्न प्राधिकरणले आग्रह गरेको छ ।
विपद्मा परी हालसम्म ६,६७६ जना घाइते भएका छन् । जसमध्ये ३२७ जनाको विभिन्न १० वटा अस्पतालमा उपचार भइरहेको छ भने २४२ जना उपचारपछि घर फर्किएका छन् । घाइतेहरूको उपचारमा नेपाली सेनाले ३,३७९ र सशस्त्र प्रहरीले २,९७० जनालाई सेवा प्रदान गरेका छन् । बाढी प्रभावित क्षेत्रबाट हालसम्म १३,३९६ जनाको सफल उद्धार गरिएको छ । रसुवा, नुवाकोट र धादिङका ३९ वटा होल्डिङ सेन्टरमा ३,५३३ जनालाई सुरक्षित राखिएको छ ।
अझै पनि ४,९९४ जना व्यक्तिहरू सम्पर्कविहीन रहेका छन् । यसमा नुवाकोटका २,३४०, रसुवाका १,९६७, सुरक्षाकर्मी तथा कर्मचारी १०० जना र ५८७ जना विदेशी पर्यटक रहेका छन्
बेपत्ताहरूको खोजी तथा उद्धारका लागि २१,४०२ जना सुरक्षाकर्मी परिचालन गरिएको छ, जसमा नेपाली सेनाका ९,२८७, नेपाल प्रहरीका ७,९१२ र सशस्त्र प्रहरीका ४,२०३ जना रहेका छन् । उद्धार कार्यका लागि नेपाली सेना र निजी क्षेत्रका हेलिकप्टरहरूले १,४७९ पटक उडान भरेका छन् ।
सरकारले प्रभावित क्षेत्रमा राहत वितरणलाई तीव्रता दिएको छ । भदौ २२ गते मात्रै २ वटा हेलिकप्टर र ८ वटा मिनी ट्रक मार्फत खाद्यान्न तथा गैर–खाद्यान्न सामग्री ढुवानी गरिएको छ ।
सरकारले रसुवा र नुवाकोट जिल्लालाई १–१ करोड, धादिङलाई ५० लाख र प्रभावित १५ वटा पालिकालाई कुल १३ करोड ५० लाख रुपैयाँ नगद राहत उपलब्ध गराएको छ । प्रभावित क्षेत्रमा मनोसामाजिक परामर्शका लागि १५० जनाभन्दा बढी स्वास्थ्यकर्मी परिचालन गरिएको छ । –न्युज एजेन्सी नेपाल
