काठमाडौं । रसुवाको भोटेकोशी बाढीपछि प्रभावित माथिल्लो त्रिशूली–३ ए जलविद्युत् आयोजनाको सुरुङबाट उद्धारकर्मीहरूले एउटा शव फेला पारेका छन्। यसअघि सोही सुरुङबाट दुई जनालाई जीवितै उद्धार गरिएको थियो।
आयोजनाका प्रमुख आवाश ओझाका अनुसार सुरक्षाकर्मीको उद्धार टोलीले सुरुङभित्रबाट एउटा शव बाहिर निकालेको हो। फेला परेको शवको पहिचान भने अहिलेसम्म हुन सकेको छैन।
सुरुङमा फसेका व्यक्तिहरूको उद्धारका लागि नेपाली सेना, सशस्त्र प्रहरी, नेपाल प्रहरी तथा नेपाल विद्युत् प्राधिकरणको टोली निरन्तर परिचालित छ।
यसअघि उद्धार टोलीले आयोजनाका विद्युत् प्राधिकरणका मेकानिकल फोरम्यान सञ्जय साह र सुपरभाइजर कविर महर्जनलाई जीवितै उद्धार गरेको थियो। उनीहरूलाई उद्धारपछि काठमाडौंस्थित नेपाली सेनाको अस्पतालमा ल्याई उपचार भइरहेको छ।
सुरुङभित्र अझै अन्य व्यक्ति फसेको हुनसक्ने आशंकामा उद्धार तथा खोजी कार्य जारी रहेको आयोजनाले जनाएको छ।
