काठमाडौँ । रसुवामा आएको बाढीबाट प्रभावित तथा घाइतेको उपचारका लागि काठमाडौँका ६ वटा अस्पताललाई तयारी अवस्थामा राखिएको छ।
स्वास्थ्य तथा खाद्य स्वच्छता मन्त्रालयले बाढी प्रभावित क्षेत्रमा घाइते हुनेहरूको उपचारका लागि काठमाडौँका प्रमुख अस्पतालमा चिकित्सक तथा स्वास्थ्यकर्मीलाई तयारी अवस्थामा राखिएको जनाएको हो।
मन्त्रालयका अनुसार वीर अस्पताल, राष्ट्रिय ट्रमा सेन्टर, त्रिवि शिक्षण अस्पताल, पाटन अस्पताल, निजामती कर्मचारी अस्पताल र नेपाल प्रहरी अस्पताललाई बाढी प्रभावितको उपचारका लागि तयारी अवस्थामा राखिएको छ।
बाढीका कारण घाइते तथा बिरामीलाई आवश्यकताअनुसार तत्काल काठमाडौँ ल्याएर उपचार गर्न सकिने गरी अस्पतालहरूलाई तयारी अवस्थामा राखिएको मन्त्रालयले जनाएको छ। साथै, आपत्कालीन स्वास्थ्य सेवा व्यवस्थापनलाई प्रभावकारी बनाउन स्वास्थ्य संयन्त्रलाई समेत सक्रिय बनाइएको छ।
