काठमाडाैँ । स्याङ्जामा नदीजन्य पदार्थको अवैध उत्खनन तथा ओसारपसारमा प्रयोग भएका दुई वटा ट्याक्टरलाई नियन्त्रणमा लिई जरिवाना गरिएको छ।
सम्बन्धित निकायले नियन्त्रणमा लिएका ट्याक्टरलाई आवश्यक कारबाहीका लागि २०८३ भदौ ८ गते सम्बन्धित पालिकामा पठाएको थियो। पालिकाले दुवै ट्याक्टरलाई जनही १० हजार रुपैयाँ जरिवाना गरेपछि छाडिएको जनाइएको छ।
जरिवानामा पर्नेमा लु.३ त. ५२५३ नम्बरको ट्याक्टर रहेको छ। उक्त ट्याक्टरलाई स्याङ्जाको चापाकोट नगरपालिका–८ स्थित दामाचौरको बनकट्टा घाटबाट नियन्त्रणमा लिइएको थियो। कारबाहीका लागि चापाकोट नगरपालिकाको कार्यालयमा पठाइएकोमा नगरपालिकाले १० हजार रुपैयाँ जरिवाना गरेको हो।
त्यस्तै, ग.१ त. ६१११ नम्बरको ट्याक्टरलाई स्याङ्जाको भिरकोट नगरपालिका–६ स्थित एक्वाबाट नियन्त्रणमा लिइएको थियो। उक्त ट्याक्टरलाई आवश्यक कारबाहीका लागि भिरकोट नगरपालिकाको कार्यालय पठाइएकोमा १० हजार रुपैयाँ जरिवाना गरिएको जनाइएको छ।
जरिवाना असुल गरेपछि दुवै ट्याक्टरलाई छाडिएको सम्बन्धित निकायले जनाएको छ।
