काठमाडौं । सत्तारुढ दल राष्ट्रिय स्वतन्त्र पार्टी (रास्वपा) का सांसद अमरेशकुमार सिंहले सरकारप्रति जनताको प्रभाव र विश्वास घट्दै गएको बताएका छन् ।
प्रतिनिधिसभाको बैठकमा बोल्दै सांसद सिंहले तीन वर्षीया बालिकामाथि भएको बलात्कारपछि हत्या तथा सप्तरीमा बालिकाको हत्यालगायतका घटनाले आफूहरूलाई मर्माहत बनाएको बताए ।
उनले यस्ता घटनालाई दुईवटा घटनामा मात्रै सीमित गरेर हेर्न नहुने धारणा राखे । सरकार गठन भएयता कप्तानगञ्जको घटना, धार्मिक तथा सामाजिक सद्भावमा देखिएका समस्या र विभिन्न आन्दोलनका घटनाले जनतामा निराशा बढाएको उनको भनाइ थियो ।
‘हाम्रो सरकार बनेदेखि चाहे कप्तानगञ्जको घटना होस्, धार्मिक र सामाजिक सद्भावको कुरा होस् वा विभिन्न किसिमका आन्दोलन हुन् । मिटरब्याज पीडित, लघुवित्त पीडित र डाक्टरका आन्दोलन पनि दिनानुदिन भइरहेका छन्,’ सिंहले भने, ‘यसले के देखाउँछ भने हाम्रो सरकारको प्रभाव र विश्वास जनतामा घट्दै गइरहेको छ ।’
सिंहले पछिल्लो समय अराजकता, अस्थिरता, हत्या, हिंसा र बलात्कारजस्ता घटना बढिरहेको भन्दै सरकारको गम्भीर ध्यानाकर्षण गराए ।
यस्ता घटना तथा विभिन्न आन्दोलनले नेपाली जनता पीडामा रहेको स्पष्ट देखाउने भन्दै उनले सरकारले जनताको सुरक्षा र विश्वास कायम गर्न प्रभावकारी कदम चाल्नुपर्नेमा जोड दिए ।
