काठमाडाैँ । काठमाडौं उपत्यकामा सञ्चालन हुने सार्वजनिक सवारीसाधनको वास्तविक अवस्था तथा आवागमनबारे जानकारी लिन सकिने ‘केटीएम पब्लिक ट्रान्सपोर्ट’ मोबाइल एप सार्वजनिक गरिएको छ ।
संघीय राजधानी सहरी क्षेत्र सार्वजनिक यातायात परिषद्को बुधबार बसेको तेस्रो बैठकमा परिषद्का अध्यक्ष एवं काठमाडौं महानगरपालिकाका कार्यवाहक प्रमुख सुनिता डंगोलले एप सार्वजनिक गर्नुभएको हो ।
एपमार्फत जीपीएस जडान गरिएका सार्वजनिक सवारीसाधनको वास्तविक स्थान तथा यात्रुले पर्खिरहेको स्थानमा सवारी पुग्न लाग्ने समयबारे जानकारी लिन सकिनेछ । हालसम्म एपमा १ हजार २ सय सार्वजनिक सवारीसाधन जोडिएका छन् ।
एप सार्वजनिक गर्दै कार्यवाहक प्रमुख डंगोलले उपत्यकाको सार्वजनिक यातायात सुधार कुनै एक स्थानीय तहले मात्र गर्न नसक्ने बताउनुभयो । काठमाडौं, ललितपुर, कीर्तिपुर, भक्तपुरलगायतका स्थानीय तह एकअर्कासँग जोडिएकाले यातायात क्षेत्रको समस्या समाधानका लागि साझा पहल र वित्तीय साझेदारी आवश्यक रहेको उहाँको भनाइ थियो ।
उहाँले उपत्यकामा रहेका ३ हजारभन्दा बढी सार्वजनिक सवारीसाधनलाई क्रमशः एपमा जोड्दै लैजानुपर्ने बताउनुभयो । प्रहरीसँग रहेको सार्वजनिक सवारीसम्बन्धी तथ्यांकलाई समेत एपमा एकीकृत गर्न पहल गरिने उहाँले जानकारी दिनुभयो ।
बैठकमा डंगोलले रात्री बस सेवा प्रभावकारी बन्दै गएको पनि बताउनुभयो । काठमाडौं महानगरपालिका, ललितपुर महानगरपालिका, चन्द्रागिरि नगरपालिका र बूढानीलकण्ठ नगरपालिकालाई समेटेर वैशाख १ गतेदेखि पाइलटका रूपमा रात्री बस सेवा सञ्चालन गरिएको उहाँले जानकारी दिनुभयो ।
उहाँका अनुसार रात्री बस सेवाबाट हरेक महिना २२ हजारदेखि २५ हजारसम्म यात्रुले सेवा लिइरहेका छन् । जेठ महिनामा मात्रै २८ हजार यात्रुले रात्री बस सेवा प्रयोग गरेका थिए ।
रात्री बस सेवा विशेषगरी श्रमिक वर्गका लागि आवश्यक देखिएको डंगोलको भनाइ छ । राति ८ बजेपछि सार्वजनिक सवारीको उपलब्धता घट्ने तर कतिपय श्रमिकको काम ९ बजेसम्म हुने भएकाले उनीहरूलाई लक्षित गरी रात्री बसका रुट थप विस्तार गर्न आवश्यक रहेको उहाँले बताउनुभयो ।
रात्री बसको रुट विस्तारका लागि साझा यातायातसँग छलफल भइरहेको जानकारी दिँदै उहाँले विद्यार्थीलाई लक्षित गरी बिहानको समयमा समेत थप छिटो सार्वजनिक सवारी सञ्चालन गर्ने योजना रहेको बताउनुभयो । त्यसका लागि साझा यातायातसँगै अन्य यातायात व्यवसायी तथा सेवा प्रदायकसँग पनि सहकार्य गरिने उहाँको भनाइ छ ।
परिषद्का उपाध्यक्ष एवं ललितपुर महानगरपालिकाका प्रमुख चिरीबाबु महर्जनले यात्रुले सार्वजनिक बस प्रयोग गर्दा सहजता महसुस गर्ने गरी यातायात प्रणाली सुधार गर्नुपर्ने बताउनुभयो ।
बैठकले चालु आर्थिक वर्षका लागि बस स्टपर तथा पिक–ड्रप प्वाइन्ट निर्धारण गर्ने निर्णय गरेको छ । त्यस्तै, रात्रि बस सञ्चालनका शर्त तथा सम्झौताको मोडल तयार गरी नगरपालिकासँग सहकार्य अघि बढाउने निर्णय गरिएको छ ।
स्थानीय तहसँगको साझेदारीमा मुख्य बस स्टप तथा बसपार्कमा जीपीएस ट्रयाकिङमा आधारित सार्वजनिक यातायात सूचना प्रणाली जडान गर्ने कार्यक्रमसमेत बैठकले स्वीकृत गरेको छ । नगदरहित भाडा प्रणाली लागू गर्न आवश्यक कानुनी पूर्वाधार तयार गर्ने निर्णय पनि गरिएको छ ।
यात्रुले टिकट लिने संस्कारलाई प्रोत्साहन गर्न अभियान सञ्चालन गर्ने तथा सार्वजनिक यातायातसम्बन्धी अध्ययन र अनुसन्धानका कार्यक्रम अघि बढाउने निर्णयसमेत बैठकले गरेको छ ।
