काठमाडौं । अविरल वर्षाका कारण रोल्पाको थवाङ गाउँपालिका–५, कोतलाबाङमा गएको भीषण पहिरोमा परी सात जनाको मृत्यु र पाँच जना बेपत्ता भएको घटनाप्रति राष्ट्रिय स्वतन्त्र पार्टी (रास्वपा)ले दुःख व्यक्त गरेको छ।
रास्वपाका महामन्त्री विपिनकुमार आचार्यले विज्ञप्ति जारी गर्दै पहिरोमा परी ज्यान गुमाउनेहरूप्रति भावपूर्ण श्रद्धाञ्जली अर्पण गर्दै शोकाकुल परिवारजनमा गहिरो समवेदना व्यक्त गरेका छन्। उनले घाइतेहरूको शीघ्र स्वास्थ्यलाभको कामना गर्दै बेपत्ताहरूको प्रभावकारी खोजी कार्य गर्न सरकारको ध्यानाकर्षण गराएका छन्।
विज्ञप्तिमा पछिल्लो २४ घण्टामा रोल्पालगायत देशका विभिन्न भागमा बाढी र पहिरोले ठूलो क्षति पुर्याएको उल्लेख गर्दै उद्धारमा खटिएका सुरक्षाकर्मी र स्थानीय नागरिकको प्रयासको प्रशंसा गरिएको छ।
रास्वपाले विपद् आइसकेपछि मात्रै राज्य संयन्त्र सक्रिय हुने परम्परागत कार्यशैलीमा सुधार आवश्यक रहेको जनाएको छ। विपद् जोखिम न्यूनीकरणका लागि पूर्वसूचना प्रणाली प्रभावकारी बनाउन, जोखिमयुक्त बस्ती पहिचान गरी सुरक्षित स्थानान्तरण गर्न तथा प्रभावित क्षेत्रमा तत्काल उद्धार, राहत र निःशुल्क उपचारको व्यवस्था गर्न तीनै तहका सरकारलाई आग्रह गरिएको छ।
निरन्तरको वर्षाका कारण देशभर जनजीवन, सडक सञ्जाल र बस्तीहरू जोखिमपूर्ण बनेकाले अत्यावश्यक कामबाहेक यात्रा नगर्न तथा नदी किनार र पहिरोको जोखिम भएका क्षेत्रमा विशेष सावधानी अपनाउन पनि रास्वपाले आम नागरिकलाई अपिल गरेको छ।
विपद्को समयमा राज्य नागरिकको अभिभावक बनेर उभिनुपर्ने भन्दै रास्वपाले प्रभावित क्षेत्रका नागरिकको साथमा रहेको जनाएको छ। साथै, विपद् पूर्वतयारी तथा विपद्पछिको उद्धार र राहत कार्यमा राज्यका संयन्त्रलाई सहयोग गर्न पार्टीका सम्पूर्ण संयन्त्रलाई चौबीसै घण्टा तयार रहन आचार्यले आग्रह गरेका छन्।
