काठमाडौं । महिला, बालबालिका, लैङ्गिक तथा यौनिक अल्पसंख्यक तथा सामाजिक सुरक्षा मन्त्री सीता बादीले महिलाको सुरक्षालाई तत्काल सुनिश्चित गर्ने उद्देश्यले ‘ब्लु बस’ सेवा सञ्चालनमा ल्याइएको स्पष्ट पार्नुभएको छ।
बिहीबार राष्ट्रिय सभाको बैठकमा सांसदसँगको प्रश्नोत्तर कार्यक्रममा बोल्दै मन्त्री बादीले ‘ब्लु बस’ सेवा महिलालाई अन्य सार्वजनिक यातायात प्रयोग गर्नबाट रोक्ने वा नियमित सार्वजनिक यातायात प्रणालीलाई प्रतिस्थापन गर्ने उद्देश्यले सञ्चालनमा नल्याइएको बताउनुभयो। उहाँका अनुसार सार्वजनिक यातायातमा महिलाले भोग्दै आएका यौनजन्य दुर्व्यवहार, असुरक्षा, अत्यधिक भीडभाड तथा आवागमनका व्यवहारिक कठिनाइलाई तत्काल सम्बोधन गर्न लक्षित उपायका रूपमा यो सेवा सुरु गरिएको हो।
उहाँले सरकारले लैङ्गिक असमानता बढाउने नभई महिलाले सार्वजनिक यातायातमा भोगिरहेका विद्यमान असमान जोखिमलाई न्यूनीकरण गर्ने उद्देश्यका साथ ‘ब्लु बस’ सेवा सञ्चालनमा ल्याएको स्पष्ट पार्नुभयो।
मन्त्री बादीले सरकारको दीर्घकालीन लक्ष्य महिला र पुरुषलाई अलग–अलग यात्रा गराउनु नभई एउटै सार्वजनिक बसमा सम्मानजनक, सुरक्षित र सहज रूपमा यात्रा गर्न सक्ने वातावरण निर्माण गर्नु रहेको बताउनुभयो।
उहाँले महिलामाथि सार्वजनिक बसमा हुने दुर्व्यवहार र जोखिमलाई तत्काल सम्बोधन गर्नु सरकारको जिम्मेवारी भएको उल्लेख गर्दै सबैका लागि सुरक्षित, सम्मानजनक र व्यवस्थित सार्वजनिक यातायात प्रणाली निर्माण गर्न सरकार गम्भीरतापूर्वक अघि बढिरहेको बताउनुभयो।
