काठमाडौं । नेपाल आदिवासी जनजाति महासंघले ३२औँ विश्व आदिवासी दिवसको सम्पूर्ण तयारी पूरा भएको जनाएको छ। महासंघले बिहीबार काठमाडौंमा पत्रकार सम्मेलन गर्दै यस वर्षको दिवस देशभर विभिन्न कार्यक्रमका साथ मनाइने जानकारी दिएको हो।
संयुक्त राष्ट्रसंघको घोषणाअनुसार प्रत्येक वर्ष अगस्ट ९ मा मनाइने विश्व आदिवासी दिवस यस वर्ष ‘प्राप्त अधिकार रक्षा आजको आवश्यकता! पहिचानसहितको समावेशी र न्यायपूर्ण नेपाल निर्माणमा हाम्रो साझा प्रतिबद्धता!!’ भन्ने मूल नाराका साथ मनाउन लागिएको महासंघका महासचिव विमल सारु मगरले जानकारी दिनुभयो।
उहाँले संविधानले परिकल्पना गरेको समावेशी लोकतन्त्र, सामाजिक न्याय र समान अवसरको मर्मअनुसार आदिवासी जनजातिको अर्थपूर्ण सहभागिता सुनिश्चित गर्नु अहिलेको आवश्यकता रहेको बताउनुभयो।
महासंघका अनुसार साउन २४ गते देशभरका आदिवासी जनजातिहरू मौलिक भेषभूषा, बाजागाजा, सांस्कृतिक झाँकी, लोकगीत र परम्परागत नृत्यसहित काठमाडौंको भृकुटीमण्डपमा भेला हुनेछन्। त्यहाँबाट सुरु हुने र्याली भद्रकाली, सहिदगेट, सुन्धारा र वीर अस्पताल हुँदै टुँडिखेलस्थित खुलामञ्चमा पुगेर मूल समारोहमा परिणत हुनेछ।
मूल समारोहको उद्घाटन उपराष्ट्रपति रामसहायप्रसाद यादवले गर्ने कार्यक्रम रहेको छ। कार्यक्रममा विभिन्न आदिवासी जनजातिका मौलिक सांस्कृतिक प्रस्तुति प्रदर्शन गरिनुका साथै रैथाने परिकार, परम्परागत खाद्य संस्कृति, हस्तकला तथा स्थानीय उत्पादनको प्रदर्शनी र बिक्री–वितरण गरिनेछ।
यस्तै, आदिवासी जनजातिका अधिकार, भाषा, संस्कृति र पहिचानलगायत विषयमा विज्ञहरूसँग प्यानल छलफलसमेत आयोजना गरिने महासंघले जनाएको छ।
महासंघले विश्व आदिवासी दिवसलाई सप्ताहव्यापी रूपमा मनाउने जनाएको छ। भाषा, संस्कृति, सभ्यता, इतिहास, परम्परागत ज्ञान, भूमि तथा प्राकृतिक स्रोतसँगको सम्बन्ध संरक्षण गर्नु राष्ट्रको साझा दायित्व भएको उल्लेख गर्दै महासंघले संविधानमा व्यवस्था भएका समानुपातिक समावेशी प्रतिनिधित्व, सामाजिक न्याय, समान अवसर, मातृभाषा संरक्षण, सांस्कृतिक अधिकार तथा आदिवासी जनजातिको सम्मानजनक सहभागिताको पूर्ण कार्यान्वयन गर्न सरकारसँग माग गरेको छ।
