काठमाडौं। नेपाली महिला रेफ्री लक्ष्मी श्रेष्ठ डेनमार्कमा आयोजना हुने विश्वप्रसिद्ध युवा फुटबल प्रतियोगिता ‘डाना कप (DANA Cup)’ मा खेल सञ्चालनका लागि पुनः मनोनित भएकी छन्।
जुलाई २० देखि सुरु हुने प्रतियोगितामा उनले रेफ्री तथा सुपरभाइजरको भूमिकामा सहभागिता जनाउनेछिन्।
लक्ष्मी सन् २०२२ देखि लगातार डाना कपका लागि चयन हुँदै आएकी छन्। विश्वभरका हजारौँ युवा खेलाडी र खेल अधिकारीहरू सहभागी हुने यस अन्तर्राष्ट्रिय प्रतियोगितामा निरन्तर अवसर प्राप्त गर्नु उनको व्यावसायिक दक्षता, निष्पक्ष निर्णय क्षमता र खेलप्रतिको समर्पणको प्रमाणका रूपमा हेरिएको छ।
सन् १९८२ देखि डेनमार्कमा हरेक वर्ष आयोजना हुँदै आएको डाना कपलाई विश्व फुटबलमा युवा खेलाडीहरूको ‘मिनी विश्वकप’ का रूपमा चिनिन्छ। प्रतियोगितामा विश्वका ४५ भन्दा बढी देशका एक हजारभन्दा बढी टोलीहरूको सहभागिता रहने गर्छ।
यस्तो प्रतिष्ठित अन्तर्राष्ट्रिय प्रतियोगितामा नेपाली महिला रेफ्रीको निरन्तर सहभागिताले नेपाली फुटबल र रेफ्रिङ क्षेत्रको अन्तर्राष्ट्रिय पहिचानलाई थप मजबुत बनाएको खेलकुद क्षेत्रका जानकारहरूको भनाइ छ। साथै, लक्ष्मीको सफलताले नेपालमा रेफ्री बन्ने लक्ष्य राखेका युवा तथा विशेषगरी महिलाहरूलाई प्रेरणा प्रदान गर्ने अपेक्षा गरिएको छ।
उनको मनोनयनपछि खेलप्रेमी, शुभेच्छुक तथा खेलकुदसँग सम्बन्धित विभिन्न व्यक्तित्वहरूले सामाजिक सञ्जालमार्फत बधाई तथा शुभकामना व्यक्त गरेका छन्। उनीहरूले डेनमार्कमा हुने प्रतियोगितामा लक्ष्मीको सफल सहभागिताका लागि शुभेच्छा व्यक्त गरेका छन्।
