काठमाडौँ । यो सरकारले एक्स्प्रेस गाडीको प्रसंग चितवनबाट भित्र्याएको हो । चितवनमा हालै सम्पन्न भएको रास्वपाको पहिलो महाधिवेशनमा सम्बोधनका क्रममा स्वयं प्रधानमन्त्री बालेन्द्र शाहले सरकारको काम एक्सप्रेस गाडीको गतिमा भइरहेकाले त्यो नरोकिने र दुर्घटनामा पनि नपर्ने बताएका थिए ।

तर उनले त्यो प्रसंग पनि त्यहाँ पाहुनाका रुपमा उपस्थित भएका विभिन्न राजनीतिक दलका नेताहरुले व्यक्त गरेको चासोका कारण व्यक्त गरेका हुन् । पुराना भनिने राजनीतिक दलका नेताहरुले यो सरकारको काम गराइ र हतारको अवस्था देख्दा सरकारको गाडी दुर्घटनामा पनि पर्नसक्ने आशंका व्यक्त गरेका थिए र सरकारलाई गति कम गरेर सुरक्षित यात्रा गर्न भनेका थिए ।

यो पनि पढ्नुहोस: मिडिया कार्यालय अगाडि शंकास्पद गाडी पार्किङ, आवतजावत प्रभावित

त्यसैको ओठे जवाफमा प्रधानमन्त्रीले भनेका थिए— सरकारको गति एक्सप्रेस गाडी जस्तै हो, यसको गति सीमित पनि हुँदैन र यो दुर्घटनामा पनि पर्नेवाला छैन । यो गाडी एक्स्प्रेस हो र सुपर हाइवेमा चलिरहेको छ ।

हो, त्यही गाडीको प्रसंग हिजो काठमाडौँमा निकै चल्यो । किनभने काठमाडौँका केही प्रमुख सञ्चारमाध्यमका गेट गेटमा लगेर यी गाडी पार्किङ गरिएको थियो । बिहान अकस्मात कान्तिरपुर दैनिक, अनलाइनखबर, हिमालयन टेलिभिजनका गेटमा अरु गाडी बाहिर निकाल्न पनि नमिल्ने गरी ती गाडी राखिएको थियो ।

यो बडो अनौठो खालको घटना काठमाडौमा पहिलो पटक भएको थियो । झण्डै करोड रुपैयाँ पर्ने गाडी बेवारिसे थियो र बेखबर नै ती मिडिया हाउसको गेटमा पार्किङ गरेर राखिएको थियो । त्यो देखेर मिडिया हाउसहरु पनि चकित परेका थिए ।

बिहान केही बेर त यो किन र कसरी भयो भन्ने बारेमा उनीहरु सोच्न पनि सकेका थिएनन् । तर अरु पनि केयौँ मिडिया हाउस र उता नेपाली कांग्रेसका सभापति गगन थापाको घरमा पनि यस्तै घटना भएपछि भने सबैले बुझे कि यो अरु कोही नभएर सरकार संरक्षित मानिसहरुबाट भइरहेको छ ।

हुन पनि परिस्थित त्यस्तै भयो । दिउँसो प्रहरीले ती गाडी क्रेनले झिकेर हटायो र पछि साँझसम्म यो थाहा भयो कि ती गाडीहरु रास्वपाकै कार्यकता र प्रधानमन्त्री निकटका मानिसहरुका रहेछन् । त्यसपछि भने काठमाडौँमा फेरि अर्काे सन्नाटा नै छायो ।

किनभने हिजो नयाँ सडक र काठमाडौँका कतिपय सडकहरुमा यस्तै अस्तब्यस्त अवस्था थियो भने आज मिडिया हाउसकै गेटमा यस्तो देखियो । यो कतै सरकारकै डिजाइनमा त यस्तो भएको होइन भन्ने नै मानिसहरुका मनमष्तिस्कमा उठ्यो ।

सत्तारुढ रास्वपाले नै यो घटनालाई लिएर विज्ञप्ति जारी गर्दै छानबिनको माग गरेको छ । यस्ता शंकाष्पद गतिविधमा संलग्नलाई पहिचान गरी कानून बमोजिम कारवही गर्न माग गरिएको छ ।

बेवारिसेमध्येको एउटा गाडी रास्वपाकै नेताको भएको पुष्टी भइसकेको छ । कान्तिपुरको कार्यालय गेटमा राखिएको गाडी रास्वपाको केन्द्रीय अनुसन्धान तथा अभिलेखीकरण विभागका सदस्य रहेका रवी जैसवालको रहेको खुलेको हो ।

ज्योति कन्सर्नको नाममा बुकिङ गरेको गाडी बिक्रेता एसटी मोटर्सको नाममा नै रहेको छ । जैसवाललाई महाधिवेशनअघि महामन्त्री भूपदेव शाहले विभागमा मनोनीत गरेका थिए । कान्तिपुरले आफ्नो कार्यालयको गेटमा अज्ञात व्यक्तिले गाडी पार्किङ गरेर हिँडेको सीसीटीभी फुटेज सार्वजनिक गरेको छ । उक्त फुटेजमा सुरक्षा गार्डले सम्झाउँदा सम्झाउँदै पनि चालकले गाडी छाडेर हिँडेको देखिन्छ ।

अनलाइन खबरमा गाडी छेड्ने व्यक्तिको पनि पहिचान भएको छ । अनलाइनखबरको गेटअगाडि बा १२च ८५४५ नम्बरको हुण्डाइ ग्राण्ड आइ१० पार्किङ गरिएको थियो । यो गाडी सुनिल पौडेलको नाममा छ । उनी पनि रास्वपाकै कार्यकर्ता हुन् ।

यसरी सरकारका नागरिक विरोधी गतिविधिहरूमा प्रश्न उठाउँदै आएका मूलधारका सञ्चार माध्यमलाई आतंकित पार्ने उद्देश्यले शंकास्पद भिजिलान्ते गतिविधि सुरू भएका हिजो सामाजिक सञ्जालहरुमा नागरिकले मत जाहेर गरेका छन् ।

पञ्चायतकालमा स्वयं तत्कालीन प्रधानमन्त्री सूर्यबहादुर थापाले भन्ने गरेका थिए– देश दरबारले होइन, भूमिगत गिरोहले चलाउँछ । त्यस्तै गिरोहको झल्को दिनेगरी काठमाडौंमा एउटा समूह सक्रिय हुन थालेको देखिएको कतिपयको तर्क थियो ।

त्यही समूह सुकुमबासी समस्या र आत्मदाह प्रकरणजस्ता गम्भीर मुद्दाहरुलाई विषयान्तर गर्न चाहेको हुनसक्ने अनुमान पनि धेरैको छ । सुकुमवासीको व्यवस्थापन नाममा रातारात बस्ती उठाएर अमानवीय ढंगले होल्डिङ सेन्टर नामका असहज ठाउँमा सरकारले गराएको अव्यवस्थापनले तनाव उत्पन्न हुँदै थियो । अझ गणेश नेपालीको आत्मदाह प्रकरणमा सरकारबाट भएका कमजोरीमा प्रश्न उठाउने मिडियाहरूमाथि यस्ता गतिविधि केन्द्रित छन् ।

तर, सरकार मौन छ, मन्त्री प्रधानमन्त्रीहरु मौन छन् । सबैतिरबाट प्रधानमन्त्रीमाथि नै यो आरोप आइसकेको छ, तर ढुंगो बोल्ला प्रधानमन्त्री बोल्दैनन् । उनले हो पनि भनेका छैनन् र होइन भनेर मुख पनि खोलेका छैनन् ।

यो मौनताले पनि धेरै कुरा स्वीकार गरेको छ । त्यसैले मानिसहरु सधैँ एक्स्प्रेस गाडीको कुरा गर्दा सरकारकै हुनुपर्छ भनिरहेकै थिए । आखिर परिणाम पनि त्यही निस्क्यो । यसो गर्ने व्यक्ति प्रधानमन्त्री निकटका हुन् तर प्रधानमन्त्री बोल्दैनन् भनेपछि यसको अर्थ त त्यही नै हो ।

आखिर प्रधानमन्त्रीको एक्स्प्रेस गाडी सय दिनमा त्यति कुद्न सकेन । एक सय दिनमा जे जे गर्ने भनेर सरकारले कार्यसूची सार्वजनिक गरेको थियो, ती काम हुन सकेका छैनन् । जनताले ती काम भएको अनुभूति पनि गरेका छैनन् ।

त्यसपछि त जनताका प्रतिक्रियाहरु आउने नै भए । किनभने पहिलेका पुराना पार्टीले केही नगरेपछि आफूहरुले आकासका तारा झारिदिन्छौँ भन्ने शैलीमा यो सरकारले काम गर्छौँ भनेर कसम नै खाएको थियो । तर, त्यसो हुन सकेको नदेखेपछि सुकुम्बासीदेखि हुकुम्बासीसम्म सरकारप्रति आलोचनात्मक हुने नै भए ।

सम्वभतः त्यसको प्रतिक्रियास्वरुप यो अवस्था आएको हुन सक्छ । सरकारको धेरै आलोचना गरिरहेका मिडियाका कन्टेन्ट सो पार्टीका कार्यकर्तालाई मन नपरेका हुन सक्छन् । सायद त्यसै भएर पनि यो अवस्था आएको हुनसक्छ । र, विरोधस्वरुप सरकारकै एक्स्प्रेस गाडीहरु यसरी मिडियाका गेटमा पार्किङ गरेर असहमतिको सांकेतिक स्वरुप प्रदर्शन गरिएको हुनसक्छ ।