काठमाडौँ । प्रधानमन्त्री वालेन्द्र शाहले मुलुकको अर्थतन्त्रलाई गति दिन, लगानीमैत्री वातावरण सुदृढ बनाउन तथा निजी क्षेत्रको विश्वास अभिवृद्धि गर्ने उद्देश्यले आज उद्योगी तथा व्यवसायीसँग उच्चस्तरीय छलफल गर्दैछन्।
प्रधानमन्त्री तथा मन्त्रिपरिषद्को कार्यालयमा बिहान ११ः३० बजे हुने बैठकमा देशको समग्र आर्थिक अवस्था, निजी क्षेत्रका समस्या, लगानी प्रवर्द्धनका उपाय तथा सरकार–निजी क्षेत्रबीचको सहकार्यलाई प्रभावकारी बनाउने विषयमा विस्तृत छलफल हुने प्रधानमन्त्रीका प्रेस तथा अनुसन्धानविज्ञ दीपा दाहालले जानकारी दिएकी छन्।
बैठकमा निजी क्षेत्रका प्रमुख छाता सङ्गठनका प्रतिनिधिहरू सहभागी हुनेछन्। नेपाल उद्योग वाणिज्य महासङ्घ (एफएनसिसीआई)बाट अध्यक्ष अन्जन श्रेष्ठ र उद्योग समितिका सभापति उज्ज्वलकुमार श्रेष्ठ, नेपाल उद्योग परिसङ्घ (सिएनआई)बाट निवर्तमान अध्यक्ष राजेशकुमार अग्रवाल र महानिर्देशक डा. घनश्याम ओझा तथा नेपाल चेम्बर अफ कमर्स (एनसिसी)बाट अध्यक्ष कमलेशकुमार अग्रवाल र वरिष्ठ उपाध्यक्ष दीपक मल्होत्रा उपस्थित रहने कार्यक्रम छ।
प्रधानमन्त्री शाहले पदभार सम्हालेपछि निजी क्षेत्रका प्रमुख व्यवसायिक सङ्गठनका नेतृत्वसँग गर्ने यो पहिलो औपचारिक संवाद हो। सरकारले आर्थिक गतिविधि चलायमान बनाउन र निजी क्षेत्रसँगको सहकार्यलाई थप मजबुत बनाउने प्रयासस्वरूप यो बैठकलाई महत्त्वपूर्ण रूपमा हेरिएको छ।
