काठमाडौं । थाइल्यान्डबाट काठमाडौं आएका एक भारतीय नागरिकलाई प्रतिबन्धित लागुऔषध गाँजासहित प्रहरीले पक्राउ गरेको छ।
नेपाल प्रहरीको विमानस्थलस्थित लागूऔषध नियन्त्रण ब्युरो शाखाले आइतबार बिहान त्रिभुवन अन्तर्राष्ट्रिय विमानस्थलमा नियमित लगेज परीक्षणका क्रममा भारतको पश्चिम बंगालस्थित कोलकाताका ५७ वर्षीय हरि क्षेत्रीलाई नियन्त्रणमा लिएको हो।
प्रहरीका अनुसार क्षेत्रीले बोकेको सामानभित्र रहेको चकलेटको प्याकेटमा लुकाएर राखिएको थाइल्यान्डको २ किलो ८०० ग्राम गाँजा फेला परेको थियो।
लागुऔषध नियन्त्रण ब्युरोका प्रवक्ता प्रहरी उपरीक्षक दुर्गाराज रेग्मीका अनुसार क्षेत्री थाई एयरवेजको उडान नम्बर टीजी–३०९ मार्फत थाइल्यान्डको बैंककबाट काठमाडौं आएका थिए। प्रारम्भिक अनुसन्धानबाट उक्त गाँजा नेपाल हुँदै भारतको कोलकाता लैजाने योजना रहेको खुलेको ब्युरोले जनाएको छ।
प्रहरीले क्षेत्रीको पासपोर्ट र मोबाइल फोनसमेत नियन्त्रणमा लिएको छ। उनीविरुद्ध लागूऔषधसम्बन्धी कसुरमा थप अनुसन्धान भइरहेको प्रहरीले जनाएको छ।
