काठमाडौं । त्रिभुवन विश्वविद्यालयले आफ्ना सम्पूर्ण आंगिक क्याम्पसहरूलाई ६० दिनभित्र क्याम्पस परिसरबाट दलीय विद्यार्थी संगठनका संरचना हटाउन निर्देशन दिएको छ।
विद्यार्थी कल्याण तथा खेलकुद निर्देशनालयले असार १५ गते जारी गरेको पत्रअनुसार विश्वविद्यालय अनुदान आयोगमार्फत प्राप्त शिक्षा, विज्ञान तथा प्रविधि मन्त्रालयको निर्देशन कार्यान्वयन गर्न सबै आंगिक क्याम्पसलाई परिपत्र गरिएको हो।
परिपत्रमा शिक्षा क्षेत्रमा दलीय हस्तक्षेप बढ्दै जाँदा विद्यार्थीको वास्तविक आवाज ओझेलमा परेको तथा शैक्षिक गुणस्तरमा समेत नकारात्मक असर परेको उल्लेख गर्दै ६० दिनभित्र दलीय विद्यार्थी संगठनका संरचना हटाउन भनिएको छ।
यसैगरी, विद्यार्थीको प्रतिनिधित्व सुनिश्चित गर्न ९० दिनभित्र ‘स्टुडेन्ट काउन्सिल ’ वा ‘भ्वाइस अफ स्टुडेन्ट जस्ता वैकल्पिक विद्यार्थी संयन्त्र विकास गर्न पनि निर्देशन दिइएको छ।
त्रिभुवन विश्वविद्यालयको शिक्षाध्यक्ष कार्यालयअन्तर्गतको विद्यार्थी कल्याण तथा खेलकुद निर्देशनालयले उक्त निर्देशनको कार्यान्वयन गरी त्यसको प्रगति विवरण यथाशीघ्र निर्देशनालयमा पठाउन सबै क्याम्पस प्रमुखलाई अनुरोध गरेको छ।
