काठमाडौं । हिमालयन रिइन्स्योरेन्स कम्पनीका कायममुकायम प्रमुख कार्यकारी अधिकृत (सीईओ) मुकेश कुमार कपुरले नियुक्त भएको एक सातामै पदबाट राजीनामा दिएका छन्।
कम्पनीले एक साताअघि कपुरलाई कायममुकायम सीईओको जिम्मेवारी दिएको थियो। तर उनले असार ८ गते सोमबार नायब प्रमुख कार्यकारी अधिकृत तथा कायममुकायम प्रमुख कार्यकारी अधिकृत दुवै पदबाट राजीनामा दिएका हुन्।
कपुरको राजीनामासँगै हिमालयन रिइन्स्योरेन्सको नेतृत्वमा फेरि रिक्तता सिर्जना भएको छ। यद्यपि उनले राजीनामा दिनुको कारणबारे कम्पनीले हालसम्म औपचारिक जानकारी सार्वजनिक गरेको छैन।
कपुर कम्पनीमा नायब प्रमुख कार्यकारी अधिकृतको जिम्मेवारीमा कार्यरत थिए। उनलाई अस्थायी रूपमा प्रमुख कार्यकारी अधिकृतको जिम्मेवारी दिइएको थियो। तर जिम्मेवारी सम्हालेको छोटो समयमै उनले पद त्याग गरेका हुन्।
