काठमाडाैँ । राष्ट्रिय स्वतन्त्र पार्टी (रास्वपा) को पहिलो महाधिवेशन आइतबारदेखि सुरु भएको छ। महाधिवेशनको उद्घाटन सत्रमा विभिन्न देशका राजनीतिक दल तथा अन्तर्राष्ट्रिय राजनीतिक संगठनहरूले शुभकामना सन्देश पठाएका छन्।
महाधिवेशनमा पार्टीका विदेश विभाग प्रमुख शिशिर खनालले प्राप्त शुभकामना सन्देशहरू वाचन गर्दै सहभागीहरूलाई जानकारी गराएका थिए। शुभकामना पठाउने संस्थाहरूमा भारतको भारतीय जनता पार्टी (भाजपा), चीनको कम्युनिष्ट पार्टी (सीपीसी), कोरियास्थित अन्तर्राष्ट्रिय सम्मेलन अफ एसियन पोलिटिकल पार्टीज (आईसीएपीपी) लगायत विभिन्न देशका राजनीतिक दलहरू रहेका छन्।
यस्तै, मलेसिया र दक्षिण कोरियाका विभिन्न राजनीतिक दलहरूले पनि रास्वपाको महाधिवेशन सफलताको शुभकामना व्यक्त गरेका छन्। ती सन्देशहरूमा लोकतान्त्रिक अभ्यास, राजनीतिक सहकार्य तथा आपसी सम्बन्ध विस्तारको अपेक्षा व्यक्त गरिएको जनाइएको छ।
